بلوچ اسٹوڈنٹس ایکشن کمیٹی نا پارہ غان بلوچستان نا علاقہ حب ئٹ اِرا دے ئی ایجوکیشنل فیسٹول ہڈ تننگا ہراٹی جتا سرحال تیا مجلس آک مسر و اندن کتاب مُچی اس ہم ہڈ تننگا۔
دا ردئٹ بساک ترجمان شابیتی احوال شنک کریسہ پارے کہ بساک علمی و ادبی مجلس تا لڑ ءِ برجاء تخیسہ تدوکا دے حب ئٹ ایجوکیشنل فیسٹیول و کتاب مجلس اس ہڈ تس ہراٹی جتا سرحال تیا مجلس آک مسر۔ ایجوکیشنل فیسٹیول و کتاب مُچی ئٹ کیریئر کونسلنگ، خواننگ و نوشت، پوسکنا تعلیم و بلوچستان نا تعلیمی بست و بند، و ورنا راہشونی آ مجلس آک ہڈ تننگار ہرافتیٹ جتا شعبہ تیان تعلقدار بندغ آک پینلسٹ نا ردئٹ بشخ ہلکر و تینا خیال تا درشانی کریر۔
او پارے کہ بشخ ہلوک آک بساک نا پارہ غان مجلس ہڈتننگ ءِ داد تسر۔ پینلسٹ نا ردئٹ خوانندہ تے کیریئر کونسلنگ نا مجلس ئٹ جتا جاگہ و چاگڑد ئٹ ساڑی دود آتیا نغد کاری کریسہ پاریر کہ دا تعلیمی بست و بند ئٹ کیریئر نا اندنو وخت ئسے گچین کاری مریک ہراتم خوانندہ اسہ ہند ئسے سر مریک ہرانا سوب خوانندہ تینا لائخی تے چاہنگ آن پد سلیک۔ اندن نوشت و خواننگ نا مجلس ئٹ پینلسٹ آک کتاب خواننگ و اونا فائدہ آتیتون اوار نوشتہ کننگ نا وڑ ڈول آ شابیتی ئٹ گپ تران کریر۔
دافتیان بیدس پوسکنا ذریعہ تعلیم و بلوچستان تعلیمی بست و بند آ ہیت کریسہ اوفک پاریر کہ ساڑی دور ئٹ بلوچستان نا تعلیمی بست و بند بھاز بد حالیت ئٹی ءِ ہراڑے اسہ پارہ غان بنجائی حکومت نا پارہ غان سنگل نیشنل کرکولم نا ردئٹ تیوہ غا صوبہ آتیٹ اسٹ آ تعلیمی نصاب تخنگانے ہموڑے بلوچستان ئٹ نہ تو بھلو تعلیمی ادارہ ارے و نہ تعلیمی بست و بند ئٹ دنو سافی اس ارے ہرا پوسکنا ذریعہ تعلیم ءِ سوگوْ کننگ کے۔ جہان ئٹ ذریعہ تعلیم نا بنماسی ڈول لمئی بولی ئٹ تعلیم دوئی کننگ ءِ ولے صوبہ غاتیٹ لمئی بولی تا جاگہ غا اردو و انگریزی ءِ تخنگ نا سوب خوانندہ تا تخلیقی صلاحیت پد تموک ءُ۔
دا اِرا دے ئی مجلس ورنا راہشونی نا مجلس تون ایسر مس ہراٹی تنظیم نا مرکزی وائس چیئرپرسن شبیر بلوچ و مرکزی سیکرٹری جنرل آصف بلوچ پینلسٹ نا ردئٹ بشخ ہلکر۔
مجلس ئٹ کتاب مُچی ہم ہڈ تننگا ہراٹی جتا پبلشرز آتا سد آ کتاب آتا اسٹالک خلنگار اندن خوانندہ تا تخلیقی صلاحیت آتے مونا ہتنگ کن جتا آرٹسٹ آتا آرٹ نا مون پاشی نا مجلس ہڈ تننگا۔ فیسٹیول نا ایسری آ حب زون نا پارہ غان تیوہ غا گچین آ مہمان تے کتاب و تنظیمی آرگن نوشت ٹیکی کننگا۔