بربادی نا بُت و بلوچ
نوشت: نادیہ لانگو
دی بلوچستان پوسٹ
“بربادی” نا لوز ئنا داڑے مطلب بم و بارود آن تباہ و برباد مننگ نا اف و نہ بینگنی و بیوسی آن کہنگ کہ دا لوز داڑے تُدے بلکن دا لوز اسے ذہنی ءُ کیفیت و نفسیاتی نزوری نا درشانی کن مونا ہتنگانے۔ ہیت ئنا مسخت دادے کہ بلوچ راج ئٹ امر ذہنی و نفسیاتی نزوری تے نفسیاتی بیماری تیٹ بدل کریسہ او تینا راج ئنا بُن وبیخ و مسخت آتا برخلاف کاریم ہتنگسہ ءِ۔
دا ہیت تو پاش ءِ کہ پیشن آن بروکا چائے او انت مسخت اسیکن و انت وڑ اٹ برے جاگہی آ مخلوق نا جہد و کوشست آتا ایسری کن ہر وڑ نا چم بازی کرینے۔ بناء ٹی دا کوشست آک زوراکی و لالچ ئٹ مسورہ ولے بیست و یکمی کرن (بلکہ بیستمی کرن ہم) ہراکہ سائنس و ٹیکنالوجی نا پنٹ چاننگک دا مُست آنبار اف کہ داڑے دُنو زور اس یا جوفہ ئسے نا پنٹ کسّے تینا دوٹی توننگے اوڑان کاریم ہلنگے یا اونا اختیار مختیار پلنگے بلکہ دا زمانہ ہراکہ مشین و ایجاد آتا زمانہ ءِ، دا بندغ آن اونا اختیار آتے زور اٹ ہلوتہ بلکہ بندغ تینٹ تینا اختیارے اونا دوٹی تس ولے داسہ ہندن مس کہ بندغ نا جند ئنا دُوٹی ہچ سلتو۔ او اخس کوشست کیک ولے دا سسٹم آن پیش تمنگ کپک۔ بندغ ہنداخہ بیوس ءِ کہ دافتیان بیدس تینا شام ءِ سہب کننگ ہم کپک۔ بندغ ہندنو جاگہ سے آ اختہ ءِ کہ او آزات سمجھک تینے ولے وا ہم مشینی سسٹم نا غلام ءِ۔
بلوچ نا جیڑہ ایلو جہان آن جتا ءِ۔ انتئے کہ داڑے سائنس و سرمایہ داری تینا تیوہ انگا روح ئتو داسکان سر افس ولے دا ہیت آن ہچو انکاری اس ہم اف کہ ایلو جہان نا اثر آک داڑے بھاز تمانو۔ تو بلوچ نا جیڑہ کہ کوزہ گیر ایلو جہان آن جتاؤ چم ودی کرینے ہرافک بھاز جاگہ کوزہ گیر نا غرض آتے پورو کیرہ او بلوچ نا قومی جہدے نسخان تیرہ۔ دا چم آتیٹی اولیکو اونا پارلیمانی مننگ او “ہر اختیار پارلیمنٹ نا ءِ” بھاز زیباؤ دروشم ئسے ئٹ مونی ہتنگانے۔ ہر بندغ ءِ دا باور کرفنگانے کہ راج ئنا غُٹ مسئلہ غاتا حل پارلیمنٹ ئٹ رسینگک او پارلیمنٹ خودمختارے۔ دا ددینگٹ ئٹ ہر بندغ گیرام کرینے کہ او دیر ئسے؟ اونا تینا حیثیت انت ءِ؟ بلکہ او دانگ اینگ ددینگنگ و سرکار تو ہیت و گپ نا موقعہ پٹنگ ئٹ تینا راجی حیثیت ءِ گیرام کیک و تینا مخلوق آن بیگانہ مریک۔
ایلو نیمہ غا لس مخلوق (بلوچ راج) ءِ اسے نیمہ غا معاشی وڑٹ نِزور تورنگانے پدا نوکری نا جوفہ ئٹ راج ئنا بھلّو بشخ اس اندا ڈینڈ آتو اختہ کرینے ہراڑان او تینا اصل مسخت آن مُر و تینا انفرادی (راجی) حیثیت ءِ گوہسا کیک۔ کوزہ گیر پدا تینا بندغات آتے مونی ہتیسہ پاریفک کہ دا ویل گواچن ئٹ دُن ءِ کہ تُدوکا حکومت داڑے روزگار و ترقیاتی کاریم کتنے دا نا اصل ویل معاشی ءِ سیاسی اف۔
دننگا ہیت آک غُٹ ذہنی کیفیت ءِ مرض ئنا گواچی کیرہ، نفسیاتی وڑ اٹ بیمار مریرہ۔ تینا راجی حیثیت و راجی خواجئی ءِ گیرام کیرہ پدا دا ہمو کاریم تیٹ تمّرہ ہرافتا اصل جیڑہ تون ہچ اڑ و جنجال اس اف ولے دافتا مونا او جیڑہ اسل جیڑہ و اونا ایسری کن مش ئسے پرغنگ نا کچ اہمیت تخک ولے خوڑت نظر ئٹ ہُننگ مرے تو دا غٹ تینا اسل مسخت ئنا بیگانگی و کوزہ گیر نا چم آتا بشخ ءُ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔