برطانیہ پاکستان و ترکی تون اوار ہشت مُلک ءِ سفری رکھ ئنا خیسن آ چِر آن کشانے۔
برطانیہ جمعہ نا دے تینا سفر لڑ ءِ اپڈیٹ کرینے ہراڑان گڈ پاکستان ءِ خیسن آ چِر آن کشنگانے۔ پاکستان ئٹ برطانوی ہائی کمشنر کرسٹن ٹرنر تینا اسہ ٹوئٹ اسیٹ نوشتہ کرے کہ “ای پک کننگ آ گل و بال اُٹ کہ پاکستان ءِ خیسن آ چِر آن کشنگانے۔”
اونا مُستی پاننگ ئس کہ “کنے سما ءِ تدوکا پنچ توہ اخس سخت ئسر، بھاز آ بندغ آتیکن ہرا پاکستان و برطانیہ نا نیامٹ ئٹ خڑکی نا است خواہی نا درشانی کننگ ئسر۔”
برطانوی ٹرانسپورٹ سکریٹری گرانٹ شپس پارے کہ “22 ستمبر آ دیگر چار بجہ غان پاکستان، ترکی و مالدیپ تون اوار 8 مُلک و ڈیہہ تے خیسن آ چِر آن کشنگسہ ءِ۔”
او مُستی پارے کہ “مسافر تا آسراتی کن ٹیسٹنگ نا عمل ءِ آسرات کننگو۔”
برطانوی اخبار دی ٹیلی فراف نا ردئٹ خیسن آ چِر آن کشنگنو مُلک آتیٹ پاکستان آن بیدس ترکی، مصر، مالدیپ، سری لنکا، عمان، بنگلا دیش و کینیا ہم اوار ءُ۔
یاتی مرے کہ برطانیہ 9 اپریل آ پاکستان تون اوار چار ملک ءِ خیسن آ چِر ئٹ اوار کننگ نا پڑو کریسس۔