بلوچستان نا جتا علاقہ آتیٹ مروک تدینی تیٹ چار بندغ بیران و اسٹ ٹپی مسونے۔
حوال تا رِدئٹ دالبندین ئٹ توفک ءِ صاف کننگ نا وخت آ سم لگنگ آن اسہ لیویز کارندہ اس بیران مس۔
پولیس نا حوال تا رد ئٹ دالبندین کلی خدابخش نا ہندی لیویز سپائی محمد حسین اُرا ٹی سرکاری توفک اس صاف کننگ ئس ردی اٹ توفک نا سم ٹکا کننگ آن او ٹپی مس و دمدستی تون ہندی ہسپتال آ سر کننگا۔ بنائی دوا درمان آن گڈ کوئٹہ کن دننگا و بھاز ٹپی مننگ نا سوب آن کسر ٹی بیران مس، پین پٹ و پول برجاء ءِ-
اندن اسہ پین تدینی اسیٹی جیکب آباد نا شار ئٹ اسہ زالبول اس زار کنیسہ وت کشی کرے۔
جیکب آباد ئٹ برامی ءُ زالبول اس زار کنیسہ وت کشی کرے۔ گیشتر حوال تا رد ئٹ سول لائن تھانہ آن خڑک اے سی ڈی کالونی ٹی اسہ چنا ئسینا لمہ 32 سال ئنا عارفہ پروین زار کنیسہ وت کشی کرے ہراڑان گڈ جوْن المی کاروائی کن سول اسپتال آ دننگا، دا رد ئٹ خاہوت نا پاننگ ءِ کہ دا زالبول ذہنی وڑ ئٹ سہی الو، زاری ءُ دوا کنیسہ وت کشی کرینے، پولیس نا رد ئٹ زالبول وت کشی کرینے یا پین سوب ئسے پٹ و پول برجاء ءِ۔
اندن اسہ پین علاقہ صدر تھانہ آن خڑک قصبہ غلام عباس جکھرانی ٹی اسہ تدینی اسیٹی پنچ سال ئنا چنا اس شاہین لاشاری پنکہ نا کرنٹ نا سوب آن بیران مس۔
اندن لورالائی ٹی نا درست بندغ آتا سم کاری آن اسہ بندغ اس بیران و اسٹ اس ٹپی مس۔
پولیس نا رد ئٹ لورالائی نا علاقہ کٹوی موڑ ئٹ نادرست بندغ آتا سم کاری آن کاکئی، عظیم نا مار قوم دوتانی ہند کٹوی ندی بیران مس اندن علی شاہ، جعفری نا مار، قوم بلوچ ٹپی مس۔
پولیس جوْن و ٹپی ءِ دمدستی تون ہسپتال آ درے ہراڑے المی کاروائی آن گڈ جوْن خاہوت نا دوٹی تننگا۔ خاہوت نا رد ئٹ دا ویل متکنا دژمنی نا سوب آن مونا بس، پین کاروائی برجاء ءِ۔