بلوچستان نا ضلع کیچ نا علاقہ ہوشاب ٹی 10 اکتوبر آ پاکستانی سیکورٹی فورسز نا خلنگوک مارٹر گولہ آن بیران مروکا چنا تا جون تے ارفیسہ خاہوت بلوچستان نا دارالحکومت کوئٹہ غا سرمس۔
مرگ نا گواچی مروکا چنا تا پیرہ سردو بلوچ تومت خلکنے کہ ایف سی دا منا تو ئنا نیام ئٹی کنا خاہوت نا نیمہ بندغ آن زیات ءِ کسفینے، داسا ای انصاف خواوہ۔
مرگ نا گوچی مروکا چنا تا خاہوت 10 اکتوبر آ جون تون اوار ضلعی ہیڈ کوارٹر تربت نا شہید فدا چوک آ ارا دے تولوک برانز کریر، داسکان ضلعی بند و بست خاہوت نا خواست آتے منیتنے۔
مرگ نا گواچی مروکا چنا تا خاہوت نا اسہ خواست دادے کہ ویل ئٹ اوار ایف سی کارندہ آتے مقدمہ ئٹ پن کننگے، ولے ایف سی و ضلعی بند و بست دا ہیت آن نمن مسنو کہ ویل ئٹی ایف سی کارندہ آک اوار افس۔
ضلعی بند و بست نا پاننگ ءِ کہ چناک اسے چغلی بمب اسیتون گوازی کننگ ئسر و بمب ترخنگ نا سوب آن چناک بیران مسر۔
اندن خاہوت تون اوار آل پارٹیز کیچ، سول سوسائٹی نا پاننگے کہ ضلعی بند و بست و ایف سی نمن مسونو ولے اوفک ویل ئٹی اوار ءُ و ویل ئنا 10 منٹ آن گڈ شایدی تے ایسر کننگ و چنا تے زوراوری ئٹ کڈ کننگ کن ایف سی ویل ئنا ہند آ سر مسوسس۔
تدوکا شام خاہوت سیال آتون اوار تربت آن دارالحکومت کوئٹہ نا کنڈان رادہ مس ہراڑے ہوشاب و پنجگور نا نا سیم آ اوفتے سیکورٹی فورسز گھنٹہ آتے اسکان تورے و جون تے کڈ کننگ نا خواست کرے۔
خاہوت جون تے کڈ کننگ ءلآ منیتو و کوئٹہ نا کنڈا تینا سفر ءِ برجا ء تخا، کسر ئٹ جتا چیک پوسٹ آتیا خاہوت توننگا۔
چار شمبے نا سہب خاہوت جون تون اوار کوئٹہ آ سرمس ہراڑے زالبول و سیاسی باسک آتا بھلو کچ اس خاہوت نا مونا بسر و جلوس نا وڑ ئٹ جون تے شار ئنا ریڈ زون گورنر ہاؤس نا مونا تخیسہ تولوک برانز کریر۔
خاہوت و تولوک برانز ٹی اوار مروکا تا خواست ءِ کہ ہوشاب ویل ئٹی اوار کارندہ آتیا آ ایف آئی آر نوشتہ کننگے و بلوچستان نا آبادی تیان ایف سی ءِ کشیر۔
مرگ نا گواچی مروکا چنا تا پیرہ سردو بلوچ نا پاننگ ءِ ننا خونی ایف سی ءِ ایف سی نا چوکیک ایسر کننگر ننا پین ہچ خواست اف۔
او پین پارے تدوکا سال دسمبر نا 22 تاریخ آ ہشت بندغ ءِ فورسز کسفیسس ہرافتیٹ پنج ئنا تعلق کنا خاہوت آن ئسک دافتیٹ کنا مار ہم اوار ءُ و تدوکا تو 10 تاریخ آ کنا امو چنکا چناک شہید کننگار، اول کنا مار ءِ شہید کریسہ کنا پنج نواسہ ءِ چوری کریر، او دڑد داسکان کنا است ئٹی اس کہ اسہ پین ٹپ اس کنے تننگا۔
سردو بلوچ نا پاننگ اس کنا زند تو ایسر مسونے کنا مارک شہید کننگار داسا کنا ارا ٹی اسٹ ہم دن ءُ اف کہ کنے اِرا وخت ئنا اِرغ ایتے۔
او پین خواست کرے دا تیوہ آ گڑا تا سر سوج کننگے و کنے انصاف رسینگے و تیوہ آ بلوچستان ئٹ ایف سی چوکیک ایسر کننگر۔
تولوک برانز ٹی اوار زالبول آک پاریر کہ نن دا حکمران تیان ہچ خواست کپنہ او بلوچستان نا آسراتی تے افیر ولے ایف سی ءِ داکان کشیر ہرافک بلوچ زنک ءِ ایسر کننگ نا لڑ ءِ برجاہ تخانو۔
گورنر ہاؤس نا مونا بلوچ یکجہتی کمیٹی، بلوچ اسٹوڈنٹس آرگنائزیشن، بی این پی تون اوار راج دوست جماعت آتا باسک آتیان بیدس طلباء و شاری تا بھلو کچ اس ساڑی ءِ۔
تولوک برانز ٹی اوار مروک آک خاہوت نا کنڈان دا خواست نا امنا کرینو کہ بلوچستان نا آبادی تیان ایف سی ءِ کشر۔
تولوک برانز ٹی اوار سائمہ بلوچ دی بلوچستان پوسٹ نیوز ڈیسک ءِ پارے کہ بلوچستان آن ایف سی ی کشر دا خواست آ بلوچستان نا تیوہ آ راج دوست جماعت آک اسہ توار اس مریر۔
سائمہ پارے بلوچستان نا ہرا علاقہ ٹی فوج و ایف سی اف اوڑے بندغ آک آسرات ءُ و ہراڑے دا فورسز ءِ اوڑے بدامنی و بندغ آتے کسفینگو۔