بنگلادیش ئٹ روہنگیا باہوٹی تا کیمپ ئٹ مدرسہ غا جلہو آن 7 بندغ مرگ نا گواچی و بھاز آک ٹپی مسر۔
غیر ملکی حوال تروکا ادارہ نا رد ئٹ پولیس پارے کہ بنگلادیش و میانمار نا سیم آ جاگہی کیمپ ئٹ جمعہ نا دے سلاء بند بندغ آک اسہ مدرسہ اسیٹی سم کاری کریر و چاقو تیٹ ہم بندغ آتے ءِ خلکر۔
جون و ٹپیک اسپتال آ دننگار، ہراڑے ٹپی تے دوا درمان کننگ ءُ۔ منہ ٹپی تا حالیت خلیس نا ہد اسکان ءِ ہرانا سوب آن کہوک آ بندغ آتیٹ ودکی نا خلیس ارے۔
پولیس جلہو کروک آتا دزگیری کن قانودی کاروائی تے بناء کرینے و پٹ و پول برجاء ءِ۔
پولیس نا رد ئٹ مسہ ہفتہ مست باہوٹی کیمپ ئٹ اسہ روہنگیا کمیونٹی نا راہشون اونا دفتر آن پیشن خلنگاسس، ہراڑان گڈ اوڑے بھاز خلیس آک اریر۔
نادرست سلاء بند بندغ آک 29 ستمبر آ بنگلادیش نا کاکس بازار ئٹ باہوٹی کیمپ ٹی معب اللہ ءِ سم اس خلکوسر و دا جلہو نا ذمہ واری ءِ اسہ ہم تنظیم اس قبول کتوسس۔