بلوچستان نا علاقہ کوئٹہ، مستونگ ٹی روڈ شکست نا جتا ویل آتیٹ اسہ چناس مرگ نا گواچی، 3 بندغ ٹپی مسونو۔
حوال تا رد ئٹ کوئٹہ نا علاقہ ہزار گنجی ٹی روڈ شکست نا ویل ئٹی ہشت سال ئنا چناس مرگ نا گواچی مسونے۔
چھیپا کولخوا تا رد ئٹ تدوکا دے ہزارگنجی ٹی روڈ شکست نا ویل ئٹی 8 سال ئنا چنا روزی خان نا مار شاہ فیصل مرگ نا گواچی مس جون المی کارروائی آن گڈ خاہوت نا دو ٹی تننگا۔
اندن پین حوال ئسے نا رد ئٹ مستونگ ٹی ایرانی جوڑ کروک پک اپ و مزدہ ٹرک بھاز خراب ڈک لگار۔
گیشتر حوال تا رد ئٹ مستونگ کوئٹہ تفتان نا بھلا روڈ کانک کراس نا ہند آ ایرانی جوڑ کروک پک آپ و مزدہ ٹرک نا ڈک لگینگ نا سوب آن ہڑتوما گاڑی تیٹ خاخر لگا۔
رسینگوک حوال تا رد ئٹ ایرانی جوڑ کروک پک اپ گاڑی ایرانی پٹرول آن پر اس، گاڑی تیٹ خاخر لگینگ نا سوب آن مسہ بندغ اشینگیسہ مرگ نا گواچی مسر، اندن خاخر ء کسفینگ کن کے فائر برگیڈ نا خواست کننگا۔