حوال تا رد ئٹ کوئٹہ الیکٹرک سپلائی کمپنی (کیسکو)نا ترجمان پارے کہ ہمسایہ ملک ایران نا پارہ غان 132Kvجیکی کور۔مند ٹرانسمیشن لائن آن بجلی تننگ یک شمبے نا سہب آن یانزدہ و نیم بجہ آ بحال مس و بنائی وڑ ئٹ ایران نا پارہ غان بیرہ 20 میگاواٹ بجلی تننگ ءِ۔
گیشتر حوال تا رد ئٹ ہرانا سوب آن 80میگاواٹ نا خڑک نیستی ودی مسونے دا برقی نیستی ءِ پورو کننگ کن مکران نا مسٹ آ ضلع غاک تُربت، گوادر و پنجگور ٹی ودکی لوڈ شیڈنگ کننگ ءُ و امیت ءِ کہ زوت ایران نا پارہ غان بجلی تننگ ہڑدے ئی مرو ہراڑان گڈ مکران نا مسٹ انگا ضلع غاتا مچ علاقہ آتیٹ ودکی لوڈ شیڈنگ ایسر کننگو۔
یاتی مرے کہ ہفتہ نا دے سہب ئنا 9:34 منٹ ہمسایہ ملک ایران نا پارہ غان 132kV جیکی کور مین ٹرانسمیشن لائن آ جوڑ کروک کاریم تا رد ئٹی بجلی تننگ بند کننگاسس ہرانا سوب آن مکران نا مسٹ انگا ضلع غاتیٹ مند، تُمپ، تربت، ہوشاب، پنجگور، پسنی، اوماڑہ، جیونی، گوادر انڈسٹریل، گوادر ڈیپ سی پورٹ و گوادر گرڈ اسٹیشن ءِ بجلی تننگ بند مسونو داسکان دا وخت ایران آن بجلی نا بند مننگ آ کیسکو مکران نا مخلوق آن مافی و نسخان نا خواست کرینے۔