حوال تا رد ئٹ قلات شار و ایب کیب ئٹ ترند یخ ئنا لڑ برجاہ، ترند یخ ئٹی بانسی نا کچ منفی 10 اسکان ریکارڈ کننگا۔ اندن سوئی گیس و بجلی نا بحالی نا دعویٰ شک اندن سلیسر ایم ڈی سوئی گیس و کیسکو چیف وعدہ آتے پورو کتوس، ایم ڈی سوئی گیسں مدنی صدیقی نومبر 2021 ٹی قلات ہننگ نا وخت دعویٰ کریسس کہ دسمبر اسکان قلات ٹی گیس تننگو۔
اندن کیسکو چیف قلات نا مخلوقی راہشون تون اوڑدئی نا وخت بجلی نا تیوہ بحالی و بجلی نا سنگل فیس ءِ چار دے ئٹی ایسر کننگ و بجلی نا لوڈ ءِ بشخ کننگ نا وعدہ کریسس ولے اسٹ اس ہم وعدہ پورو کتو۔ بجلی نا سنگل فیس کننگ نا لڑ بند کننگتو گڑا بھلا روڈ نادرست وخت اسکان بلاک کننگو مخلوقی حلقہ آتیٹ خبر دار کننگانے۔
گیشتر حوال تا رد ئٹ قلات و ایب کیب ئٹ دتر تفوک آ یخ نا لڑ برجاہ ءِ، یاتی مرے ایم ڈی نومبر ٹی ڈپٹی کمشنر آفس قلات ٹی اسہ مخلوقی یلہ ءُ مجلس ئسے آن ہیت کریسہ دعوی کریسس کہ نن قلات کن پوسکنو پائپ لائن خلینگ ان و اوفتا کارم نا داسا یک و نیم کلو میٹر بچوک ءِ و دسمبر اسکان قلات ءِ پوسکنو پائپ لائن تیان سوئی گیس تننگ بناء کننگو ولے ارا تو گدرینگ آن بیدس قلات ءِ گیس نا سپلائی بناء مننگ کتو۔
اندن کیسکو چیف کوئٹہ ٹی قلات نا مخلوق راہشونک و قلات ٹی کیسکو کارندہ آک مسکوئی ڈپٹی کمشنر قلات سلطان احمد بگٹی نا شیف صدارت اجلاس ٹی دعوای کریسر کہ ہرا فیڈرز و لوڈ ءِ اوفتا ودکی لوڈ ءِ ہربوئی فیڈر آ سر کریسہ ہربوئی فیڈر ءِ سٹی فیڈرڈ نا رد ئٹ بجلی تننگو ولے بجلی ءِ ہردے ئی بنماس آ سنگل فیس کننگ نا لڑ داسکان برجاہ ءِ۔ ہڑتوما ادارہ آتا سر کماشی آ قلات نا مخلوق تون دروغ تڑیر و قلات ٹی سوئی گیس و بجلی نا ویل آتے ایسر کننگ کتوس ہراڑان مخلوق ٹی بھاز بے جاراتی تالان مننگ ءِ و مخلوق اسہ وار واپس برانز نا کسر ءِ ارفنگ آ بیوس مسونے۔