تحریکِ طالبان پاکستان تون ہیت برجاہ ءِ، پاکستانی فوج پک کرے

اسلام آباد: پاکستانی فوج پک کرینے کہ تحریکِ طالبان پاکستان (ٹی ٹی پی) تون مذاکرات نا لڑ برجاہ ءِ ولے دائسکان ہچو ‘سرسہبی’ دو بتنے۔

پاکستانی فوج نا اسہ سینئر افسر ئس اندا زوت حوالکار نمائندہ آتا شمالی وزیرستان نا دورہ نا وختا پاریسس کہ پاکستانی علما، جرگہ و ہندی راہشون تا ساڑی وفد افغانستان ٹی ساڑی ٹی ٹی پی نا راہشون تیتون اوڑدئی کرینے ولے پاکستانی فوجی افسر نا دا ہم پاننگ اس کہ امن و اواری کن حکومتی پڑ آ بائد ہیت مرے۔

خیال مرے کہ حکومتِ پاکستان ہم پک کریسس کہ ٹی ٹی پی تون اوفتا ہیت برجاہ ءِ و دا بابت ئٹ تدوکا سال نومبر ٹی اسہ تو نا عارضی جنگ بندی آ ہم امنائی مسوسس ولے جنگ بندی نا وخت ایسر مننگ آن گُڈ جنگ ئنا پدا پڑو مسوسس۔

مزاکرات اندنو وخت ئسے آ مننگ ءِ ہرا وخت دہشت گردی نا تدینیک خیبر پختونخوا ٹی ودنگ ءُ۔ ہرا ٹی پشاور نا اسہ شیعہ مسجد سے آ مروکا خود کش تراک ہم اوار ءِ، ہرا ٹی 60 آن گیش بندغ نا بیرانی نا حوال ارے۔ ٹی ٹی پی دا تدینی آن لا تعلقی نا درشانی کرینے ولے حکومت کن علاقہ ٹی امن چیلنج ئس جوڑ مسونے۔

پاکستانی کوالخوک اندا امیت کریسُر کہ طالبان نا افغانستان آ کنٹرول آن پد پاکستان ٹی امن برو، ولے پاکستان ٹی مروکا دا زوت ئنا دہشت گردی نا تدینی تیان گڈ پاکستانی کوالخواک دا ہیت ءِ منا نو کہ افغان طالبان نا حکومت ٹی ہم سیم آن ہیپار دہشت گردی نا کاریمک برجاہ ءُ۔

یاتی مرے کہ فروری ئٹ “ٹی ٹی پی “ پاکستان ٹی 22 جلہو تا ذمہ واری ءِ ہرفیسس۔