بلوچستان نا ضلع موسٰی خیل ئٹی اسٹ آن گُڈ ایلو بیگواہ مروک چُنا تیان اسٹ نا جون خننگانے۔
ڈپٹی کمشنر موسٰی خیل کلیم اللہ کاکڑ نا رد ئٹ 25 جولائی آ بیگواہ مروک پنچ سالی شبانہ نا جون ہفتہ نا نن آباتی آن مُر اسہ گیاوان ئسے آن خننگانے، ہرانا پوسٹ مارٹم شابیت حوال آتا بنائی سوب ٹی کاٹُم آ ٹپ و گُٹو کننگ نا نشان آک رسینگار ۔
بست و بند نا رد ئٹ چُنک سن چُنا آ ِبے دادی کریسہ اونا خون کننگانے۔ چُنا نا جون ءِ موسٰی خیل بازار آ ہتنگانے و بیران مروکا نا وارث آک بھیڈ ڈسٹرکٹ ہیڈ کوارٹر اسپتال آ رسینگار ہراکا گڈ چُنا نا جون ءِ پوسٹ مارٹم کننگ کِن کوئٹہ آ دننگا ۔
موسیٰ خیل قبائلی عمائدین ہندی میڈیا ءِ پارے کہ چُنا تون بے دادی مسُنے چُنا تا برمتہ و وے یلہ کننگ نا برخلاف علاقہ والاک تدوکا کہی دے آن برانز آ تولوک ئسُر ۔
ڈپٹی کمشنر موسٰی خیل نا پاننگ ءِ کہ ڈی این اے نا نمونہ لاہور آ گدریفینو ہرانا رزلٹ بننگ آن گُڈ تدینی ٹی اوار مروک ڈوہدار ءِ رسینگنگ ارزان مرو داسکان دانا پد رند خلنگ متنے۔
ڈپٹی کمشنر نا رد ئٹ بیگواہ مروک گیشتر اِرا چُنا تا سَن ہم چار پنچ سال نا نیام ئٹ ءِ ، ہرافتیٹ اسِٹ 30 مارچ آ و ارٹمیکو 10 اپریل آ بیگواہ کننگاسس۔
موسیٰ خیل پولیس بست و بند نا رد ئٹ اِرا کیس ئٹی خاہوت نا بندغ آک مقدمہ کننگ آ راضی الویسُر انتئے کہ اوفتا خیال ئس کہ ننا چُناتے جن آک برمتہ کریسہ تینتون دریسُر، واہم خاہوت آک و علاقائی عمائدین تا رد ئٹ برمتہ مروک مسِن تے زُوت اس آجو کننگ خوائسُرہ بست و بند بیگواہ مروک مسِن تا آجو کننگ ئٹی بے سہب مسُنے و دروغ ئٹ تینے ڈھکنگ ءِ۔
بیگواہ مروک مُسہ مسڑ نا تعلقداری ضلع موسیٰ خیل آن ءِ پولیس نا رد ئٹ و کیس ئنا رکھ کننگ ءُ و شبانہ آن ہلوک نمونہ نا رزلٹ بننگ آن گُڈ پٹ و پول ٹی گیشتر پیش رفت کننگو۔