دروپدی مرمو بھارت نا پانزدہمیکو، ارٹمیکو زالبول و بھاز پد ماندہ قبائلی تپہ آن تعلق تخوک اولیکو صدر ءِ۔ وزیراعظم مودی اونا صدر مننگ ءِ اسہ تاریخی گام اس پارے۔
بھارتی سپریم کورٹ نا چیف جسٹس این وی رمنا دو شمبے نا دے پارلیمان نا تاریخی دربار ہال ئٹ دروپدی مرمو آن بھارت نا پوسکنا صدر نا عہدہ نا سوغند ہلک۔ او دلت تپہ آن تعلقدار صدر رام ناتھ کوند نا جانشین مرو۔
سوغند ارفنگ آن گڈ مرمو تینا تران ئٹ پارے کہ اونا گچین کننگ دا ہیت ئنا شاہدی ءِ کہ بھارت ئٹ غریب ہم تغ خننگ کیک و او پورو مننگ ہم کیرہ۔
او پارے “کنا سفر اوڈیشہ نا اسہ چنکو قبائلی خلق ئسے آن بناء مس، ہراڑے بنائی خواننگ ہم اسہ تغ ئسے آنبار ءِ ولے تیوہ غا اڑاند آتیان گڈ ہم ای کالج ہنوک تینا خلق ئنا اولیکو مسڑ مسوٹ۔ کنے وارڈ کونسلر آن بھارت نا صدر مننگ اسکان موقع رسینگا۔ دا ننا جمہوریت نا طاغت ءِ و کنا گچین مننگ دا ہیت ئنا شاہدی ءِ کہ بھارت ئٹ غریب تغ خننگ ہم کیک و اوفتے پورو ہم کننگ کیک۔”
شست و چار سالہ مرمو بھارت نا تیوہ غاتیان کم سن صدر ءِ۔ او ملک نا دننگا اولیکو صدر ءِ ہرا آجو بھارت ئٹ ودی مسونے۔ او پارے؛ “کنا گچین مننگ ملک ئنا ہر غریب نا سرسہبی ءِ و دا بھارت نا کروڑ آ زالبول تا لائخی تا درشانی ءِ ہم۔”
CJI NV Ramana administers oath of office, President-elect Droupadi Murmu becomes the 15th President of India.
She is the second woman President of the country, first-ever tribal woman to hold the highest Constitutional post and the first President to be born in independent India pic.twitter.com/qXd9Kzcg2z
— ANI (@ANI) July 25, 2022
بھارتی سروزیر نریندر مودی، مرمو ءِ صدر نا عہدہ آ بننگ آ مبارک باد تریسہ دادے بھارت کن اسہ تاریخی ساہت اس پِن کرے۔ او اسہ ٹوئٹ اسیٹی پارے کہ گچین وڑئٹ غریب، پدماندہ و پد بٹنگوک خلقت کن اسہ تاریخی ساہت ئسے۔
سوغندی دود آن گڈ مرمو ءِ بیست و یک توپ ئنا سلامی تننگا۔ بھارتی صدر ہر مسٹ آ لشکر آتا “سرکماش” ہم مریک ولے اونا حالیت بھلو کچ ئسے اسکان علامتی و نشان تس کن مریک انتیکہ تیوہ غا بست و بندی ہل و تس آتا فیصلہ سروزیر و اونا کابینہ کیک، ہراڑا صدر ءِ بیرہ تینا مہر ءِ خلوئی مریک۔