بندغی حق آتا اسہ پنی ءُ گل اس سی لنکا ئٹ خانہ جنگی نا وختا مروک مننگ کروک جنگی ڈو تیا مسکوئی صدر گوٹابایا راجا پاکسے نا برخلاف ڈوہدار شکائست نوشتہ کرینے۔ جولائی نا نیام ئٹ او سنگاپور نراسُس۔
جنوبی افریقہ آن کاریم کروک بندغی حق آتا اسہ ڈل اس یکشمبے نا دے پارے کہ اوفک سن 2009 ئنا خانہ جنگی نا وختا مروک گمانی جنگی ڈو تا دوبہ ئٹ سری لنکا نا مسکوئی صدر گوٹابایا راجا پاکسے نا دزگیری نا خواست ءِ کرینو۔ دا ڈَل ئنا پاننگے کہ اوفک دا رئٹ سنگاپور نا اٹارنی جنرل نا رہی آ اسہ شکائست اس نوشتہ کرفینو۔
‘انٹرنیشنل ٹروتھ اینڈ جسٹس پروجیکٹ’ (آئی ٹی جے پی) پنی ڈل سنگاپور ئٹ دا خواست ءِ تسونے، ہرا شاہدی مُچ کروک اسہ ادارہ ئسے۔ دانا ایگزیکٹو ڈائریکٹر یاسمین سوکا نا پاننگ ئس؛ “دا شکائست دا ہیت ءِ منک کہ دا بیرہ زر کُننگ و زرگزرانی بد بست و بندی نا ہیت اس اف، بلکن بھلو پڑ ئسے آ زوراکی نا ڈو تیکن ہم اوڑان سر و سوج کننگ ءِ۔”
برجاء تو جولائی نا نیام ئٹ سری لنکا نا مسکوئی صدر راجا پاکسے ملک نا زرگزرانی بُھس کاری حالیت نا وختا نراسس۔ برانز کروک آک ہراتم اونا ماڑی آ شولنگار، تو تیوہ غاتیان مُست او مالدیپ آ سر مس و دوارہ اوکان سنگاپور آ ہناسس۔ ہموڑَے او تینا استعفیٰ ءِ ہم پارلیمان نا اسپیکر ءِ سر کریسس۔
سنگاپور نا اٹارنی ءِ تروک خواست ئٹ پاننگانے کہ سن 2009 ئٹ خانہ جنگی نا وخت آ سری لنکا نا وزیر رکھ نا حیثیت ئٹ راجا پاکسے جنیوا کنونشنز ءِ لتاڑاسس۔ دا ردئٹ سنگاپور ئٹ کوالخوا تے شکائست رسینگانے۔
سری لنکا نا خانہ جنگی نا وختا انت مسوسس؟
سری لنکا نا اسہ باغی گروپ تامل ٹائیگرز نسلی اقلیتی تامل آتیکن اسہ جتا آجو ریاست ئسے نا ہڈتس کن اسہ مرغنو جنگ اس کریسس۔ اقوام متحدہ نا حساب آتا ردئٹ سن 2009 ئٹ اندا خانہ جنگی نا وختا کم و ود اسہ لکھ بندغ خلنگار۔
دا جنگ ئنا ایسری تُوہ تا وختا کم و ود چِل ہزار تامل نسل نا شاری مرگ نا گواچی مسوسر۔ تامل ٹائیگرز نا برخلاف دا تُرند آ جنگ نا وختا راجا پاکسے ملک نا وزیر رکھ ئس و او دا دوبہ غاتیان نمن مریسہ کرینے کہ او ہچو ڈول جنگی ڈوہ ئسے نا ذمہ وار متنے۔
سری لنکا نا زوت معاشی چِک و تاڑ و اسہ تُرند ءُ بھس کاری اس ملک نا آباتی ءِ کُن خور، دارو و تیل گڑا تا ڈول نا نیستی تون پلویڑ کرے۔ دانا برخلاف برانز آک وختی آن برجاء ئسر واہم جولائی نا نیام ئٹ برانز کروک آ سڑک آتیا پیشن مسر و دا خواست کریر کہ ملک نا راہشون ملک نا زرگزرانی بھس کاری نا ذمہ واری ءِ ارفے۔