برطانیہ نا تیوہ غاتیان بھلو وخت اسکان بادشاہی کروکا ملکہ الزبتھ ارٹمی ہفتاد سال حکومت کننگ آن گڈ 96 سال ئنا سن ئٹ بالمورل ئٹ کذیت کرے۔
پنج شمبے نا دے آ اونا جانجوڑی نا بارو ئٹ خلیس آک ودنگ آن گڈ اونا خاہوت سکاٹش اسٹیٹ ئٹ اوار مس۔
ملکہ 1952 ئٹ تخت آ بس و بھاز بھلو کچ آتیٹ چاگڑدی بدلی تے خنا۔
اونا کہنگ آن گڈ، اونا بھلا مار چارلس، سابق پرنس آف ویلز، برطانیہ نا پوسکنا بادشاہ و دولت مشترکہ ئٹ اوار 14 ریاست نا سرکماش مرو۔
اسہ بیان ئسے ٹی بکنگھم پیلس پارے کہ ملکہ اینو بالمورل ئٹ کذیت کرے۔
بیان نا رد ئٹ بادشاہ (چارلس) و ملکہ کنسورٹ (کمیلا پارکر) اینو شام بالمورال ئٹ ہڈ کرور و پگہ لندن کن ہنور۔
ملکہ الزبتھ ارٹمی نا سرکماشی نا دور ئٹ ارٹمی بھلا جنگ آن گڈ شعاری نا مہم، بارطانیہ نا راج ئنا کامن ویلتھ ئٹ بدلی، سرد جنگ نا ایسری و برطانیہ نا یورپی یونین ئٹ ہننگ و پیش تمنگ تیوہ غاک اوار ء۔
دانا نیام ئٹ برطانیہ ٹی 15 وزیر اعظم بسر، ہرافتا بناء ونسٹن چرچل آن مس، ہرا 1874 ئٹ ودی مسوسس، و لز ٹرس تون اوار ہرادے برجاہ ہفتہ ملکہ تخا، دانا 101 سال آن گڈ 1975 ئٹ ودی مس، تینا سرکماشی نا دور ئٹ او وزیر اعظم آتون ہفتئی گپ ء تران کرے۔
ملکہ الزبتھ الیگزینڈرا میری ونڈسر لندن نا شار فیئر ئٹ 21 اپریل 1926 آ ودی مس و اونا تیوہ غا پن الزبتھ الیگزینڈرا میری ونزر تخنگاسس۔ داتم بھاز کم بندغ آک دا پاننگ کریرا کہ او برطانیہ نا حکمران مرو۔
ستمبر 1836 ئٹ ہراتم اونا ہلہ ایڈورڈ ہشتمی تخت آن مر مریسہ ارا وار طلاقی مروک امریکئی شاری والس سمپسن تون برام کرے گڑا الزبتھ نا باوہ جارج ششمی بادشاہ مس و 10 سال نا سن ئٹ الزبتھ تخت نا وارث جوڑ مس۔
مسہ سال آن گڈ برطانیہ نازی جرمنی نا برخلاف جنگ ئٹ اس۔ الزبتھ و اونا چنکا ایڑ، شہزادی مارگریٹ جنگ ئنا دور ئن بھلو وخت ئسے ونڈسر کیسل ئٹ گدریفیر۔ اوفتا لمہ باوہ اندا صلہ ء کریر کہ اوفتے کینیڈا کن مون تننگے۔
ملکہ الزبتھ 18 سال نا سن ئٹ پنچ توہ ایگزیلری ٹیریٹوریل سروس تون اوار گدریفے و دانا نیام ئٹ او موٹر میکینک و ڈرائیونگ نا بنماسی مہارت آتے ہیل کرے۔ ولدا دادے یات کریسہ او پاریسس کہ ‘ای دا سرپد مسونٹ کہ دژمن نا ساڑی مننگ ئٹ فخر نا احساس انتئے ودی مریک’۔
جنگ نا نیام ئٹ او تینا مر ئنا سیال یونان نا شہزادہ فلپ تون اوار چھٹی تا بدلی ء کرے، ہرا او وخت رائل نیوی ٹی تخنگاسس۔ اوفتا رومانی تعلقداری مضبوط مریسہ کرے و اوفک ویسٹ منسٹر ایبی ئٹ 20 نومبر 1947 ئٹ برام کریر، شہزادہ ڈیوک آف ایڈنبرا نا خطاب ءِ دوئی کرے۔
اوفتا اولیکو مار، چارلس، 1947 ئٹ ودی مس، داڑان گڈ شہزادی این، 1950 ٹی، پرنس اینڈریو، 1960 ئٹ و پرنس ایڈورڈ 1964 ئٹ ودی مس، و اندن اوفتیان بیست نواسہ ارے تا۔
داڑان گڈ شہزادہ فلپ 2021 ئٹ 99 سال ئنا سن ئٹ کذیت کرے۔