بزرگ بلوچ کماش مرحوم سردار عطاء اللہ مینگل نا چنکا ایلم مہر اللہ مینگل کذیت کرے۔ حوال تا رد ئٹ او ناجوڑ ئس و درو سہب نا کذیت کرے۔
میر مہر اللہ مینگل بلوچ تحریک تون ہم تفوک مسونے ہرا نا سوب او قید و بند نا سختی تے ہم سگا۔ میر مہر اللہ مینگل ڈسٹرکٹ خضدار نا ضلعی چیئرمین ہم مسونے۔
خاہوتی حوال تا رد ئٹ اونا نماز جنازہ اینو دو شمبے آ بیلہ ٹی خواننگق و پڑس وڈھ ئٹ سردار اختر مینگل، سردار اسد اللہ مینگل و ایلو خاہوت نا سروکی ٹی مرو۔
یاتی مرے ہراتم ذوالفقار علی بھٹو بلوچستان نا اولی حکومت ءِ ایسر کرے، ہرانا سروزیر سردار عطاء اللہ و گورنر میر غوث بخش بزنجو ئسر، حکومت نا ایسر کننگ آ میر مہراللہ سلاء بند مزاحمت ءِ سوگوی بشخا و مری علاقہ آن گڈ مینگل علاقہ تیٹ مزاحمت ترندی ہلک ہرا نا سروکی ءِ مہر اللہ مینگل کننگ ئس۔
پاکستان پیپلز پارٹی نا کماش بلاول بھٹو و ایلو سیاست دانک سردار اختر آن اونا ہلہ مہر اللہ نا کذیت آ ہمدردی نا درشانی کریسہ پاریر کہ مہر اللہ مینگل نا سیاسی خذمت آتے ساندہ یات تخنگو۔
بلوچ راج دوست راہشون رحیم ایڈوکیٹ ہم میر مہر اللہ نا کذیت آ اُست ہسونی نا درشانی ءِ کریسہ پارے کہ میر مہر اللہ نا کذیت نا بنیسہ سخت ڈکھ مس۔ سردار رسول بخش نا مار و سردار عطاء اللہ مینگل نا ایلم مننگ تون اوار ایماندار پاکستانی بے دادی تا بر خلاف سلاء بند جہد ئٹ کڑد و فرض ایسری تننگ نا سوب آن تاریخ ئٹ یات تخنگو۔