مہر نا سفر
نوشتکار: سہیل زہری
دی بلوچستان پوسٹ
تینا کماش ءِ پاریٹ کہ ای و کنا سنگتاک تینا خلق ئنا مش آ سفر اس کانہ، کنے کماش اجازت تس۔ ای خوش مسوٹ تینا تیاری ءِ کریٹ و تینکن ضروری ءُ گڑا ہرفیٹ کماش آن اللہ نہگیبان کریٹ۔ ای پیش مسوٹ زو زو درگہ ءِ بند کریٹ۔ سنگت آتے فون کریٹ ای تیار اُٹ۔ انداٹی سنگتاک ہم خلق آ سر مسر۔
سنگت آک اُست خواہی کریر سفر ئسے نے پارہ غا، سنگتاک ہٹ تیسور ملغہ وے پارہ غا۔ ملغہ وے زہری نا مش تیٹی ءِ زمین آن بھاز بڑز و بالادے۔ نن ہکل کرین شام نا 7بجہ آ سفر بنا مس۔ نن مش تیٹ پند خلیسا کرین مشتا چوٹی تیان ہیپار مریسہ کرین۔ دا سفر کنا زندہ نا اسہ بھاز گچین ءُ سفر اس ئس۔ کنے بھاز جارات بریک تینا وطن نا مش و جبل آتیٹ سفر کننگا ۔ دا سفر برجاء اس نن سنگتاک گام خلیسہ ئسون۔ بسون میرو زئی نا دشت اٹ سر مسون۔ خلقی ئسے نا رہی آ سر مسون ای توار کریٹ خلق آ۔ خلق والا بس نن تون سلام دوا کرے دود نا ردئٹ ننے حوال کرے۔ سنگت ننا حوال تس، چوٹ نا بند آن حوال ءِ تس۔ گپ و مجلس ٹی چاہ بس، چاہ کنگن، اعجاز تینا مار ظہور ءِ توار کرے پارے کہ مہمانک شار آن بسونوکُکڑ تڑ۔ مارکو اِرغ نا بندوبست کرے، اِرغ کنگن نن نا سئے بجہ مس۔ نن پارین اعجاز نن دمدرینگانن، سائیں کینہ۔ اوکان پد نن سنگتاک خاچان، سہب نا آذان تیان گڈ 6 بجہ غا بش مسون، خریش تون جوان کنگن اوکان پد ظہور احمد ننے آن اللہ نگہبان کرے پارے ای داسا تینا بزگل ہکل کیوہ۔ او ہنا بزگل نا رند ئٹ مش پارہ غا۔ نن اوکا پد اعجاز آن موکل کرین۔ دا خلقی آ مہر و مابت خلوص، ہنینا کچاری کنا است آن اسل ہمپرو۔ اوفتا مہر و مابت ٹی ہچ جوفہ اف او تینا زندے گدریفینو دا مش و جبل آتیٹ۔ شار نا مخلوق تین پہ تین نا ہمیخہ کپسہ سوتے بس پسہ کنپسہ، ہیت بازے ولے۔۔۔
نن تینا سفر نا پارہ راہی مسون، ننا سفر بھاز مرغن اس، نن ہم پند خلیسہ راہی ئسون ہنداٹی موبائل توار خلک تو سنگت ہرفے تا، گپ کرے پارے کماش نا ٹیلیفون اس کماش پارے کہ نم ہمبو زوس اس کُری (شوہان) کسر اُروک ءِ نما۔ زو اس سر کبو تینے او مال ءِ دیک کائک پدا خنوفیرے تا۔ نن سنگتاک ہمت کرین پند خلیسہ زو اس سر مسون تھا۔ کماش نا کُریا (شوہان) ننکن کسر اُروک اس ای تینا خیال ٹی ہندا پاریٹ نن پان کان سر مرین کری آ ءِ ہلین ایہان تا دغرے تو نن ہم گام خلیسہ ہنان سر مسون تا پیرہ پچی آ۔ پیرہ پچی ہموڑے اسہ مش ئسے ٹی ءِ۔ داسا ہمو پیر اف۔ داسا بیرہ پیرہ پچی آ ہمو جاگہ پنی ءِ۔ چاہ اس کرین چاہ آن پد واپس پند خلیسہ ہینان ٹکرے سر مسون، ٹکر ملغہ وے نا اسہ بھاز سختو مش ئسے۔ ٹکر آن شیف شوہان ننا کسر اُروک اس۔ سرمسون حال حوال کرین مجلس ہلکن، و دغرے ہلکن ایہان تا۔
کسر ارا نا نیمہ تما۔ ننے سنگت آتے سلوئی تما اگہ نن سلیتونا تو نن پین خوار مسونہ، خوار دا سوب آن کہ نن نیمہ اس، اوندائی ہم ئس۔ نن سنگتاک ہندا امنائی کرین کہ داسہ پین مونی ہنوئی اف۔ نن ہڈ کرین دا غرے تڑین۔ کسرٹ ہچ سلتویسن۔ سنگتاک دمدرینگاسر۔ ہمت کریر سنگتاک گڑاس تا پاٹ کن ہنار تو گڑاس سنگت دیر پٹار و گیڑاس مڈی ءِ ملار سامان تیان کشار سیاہ چاہ ءِ تخار، خاخر نا دامون ایمون کل سنگتاک توسر، یخ بھاز اس، گوریچ ئس۔ جنوری نا وڑ اس ملغہ وے نا یخ۔ انداڑتون جمر تفے ہورہ تا ٹاکارہ اس، ننا سیاہ چاہ ہم تیار مس، چاہ ءِ کنگن۔ پدا سنگتاک اِرغ نا تیاری ٹی لگار۔ اِرغ تیار مس، و کنگن۔ سنگتاک بھاز دمدرینگاسر۔ خاچنگ نا تیاری مس ای واِرا سنگت خاچان تینا تینا سلیپنگ بیگ آتیٹی۔۔ ایلو سنگتاتے یخ آن تغ بتو۔ ای پورہ جارات ئٹ تغ کریٹ کہ نن نیمہ غا پِر سر مس، جوان پِر مس ننے چڑیفے، دانگان پِر اینگا سخت یخ اس۔ پِر آن پد جل تا توار توار بناء مس، خلیس تما ننے کہ جل دپ ننے۔ جل بس ننے آن مر اس، نن بڑز ئسون جل آں۔ گڑا نن توسن سہبب اسکان۔
سہب نا ساف تما گڑاس سنگتاک پاریر کہ واپس کان خلق آ، ولے گڑاس سنگتاک ہندا پاریر کہ داخس سفر کرینن امر دُن زو واپسی کین۔ ہندا صلہ کرین کہ پین مونی کان تینا اصل ٹھکانہ غا سر مرین۔ ہکل کرین سنگتاک سفر بناء کریر، سہب نا وختی پِر آن پد جل وہنگ ئس، بھاز گچینو سفر اس ئس۔ ہنان اصل ٹھکانہ غا سرمسون گڑا اوڑے یخ تباہی کریکہ، بھاز بڑز ءُ ہند اس مننگ نا سوب آن سخت یخ ئس۔ قلات نا ہربوئی و زیارت آن بار بڑز و بالاد۔ چاہ و باخو اس کنگن، خاخر نا رہی آ توسن باسفین تیننے۔ اوکا پد صنوبر نا درخت نا کیرہ غان دیوان اس کرین یخ نا دیوان بھاز مزہ کرے۔ پدا سنگتاک لگار اِرغ نا تیاری ٹی سنگت اس نن تو اِرغ بسے، گڑاس دیگ بیٹ کریر، منہ سنگت ہنار پاٹ ایسر، ننا رہی آ بھاز رخت اس تو رتخت آک بھاز مالو نا ئسر ہندن لگاکہ دا رختاک بھاز بھلو عمر ئنا ءُ۔ اِرغ کنگن واپسی کن سر ہلکن۔ بسون خوشین ءِ سرمون۔ خوشین اسی مش ئسے۔ دا مش بھاز گچین ءِ۔ خوشین ٹی شام نا اِرغ کنگن۔ مڈی ءِ ارفین واپسی نا تیاری مس ہکل کریر سنگتاک۔ پند خلیسہ کرین واپسی بسون تاجد نا وخت آ 30۔3 بجہ نا وخت آ سر مسون خلق آتینا۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔