بلوچستان نا جتا علاقہ تیٹ سم کاری و ایلو وڑ ئنا ویل آتیٹ ہشت بندغ مرگ نا گواچی اندن بیست و یک بندغ ٹپی مسونو۔
ویل و تدینیک کوئٹہ، نوشکی، سوراب، دکی و ژوب ئٹ مونا بسونو۔
کوئٹہ تفتان ہائی وے آ شیخ واصل آن خڑک کار گاڑی و پک اپ ئٹ شکست نا سوب آن اسہ زالبول ئس بیران اندن اسہ چنا ئسے تون اوار اِرا بندغ ٹپی مسونو۔ حوال تا رِد ئٹ ویل ہموتم مونا بس ہراتم اسہ پک اپ ئس مون آن بروکا کار تون ڈک لگا ہرانا سوب آن پنچپائی نا ہندی اسہ زالبول ئس جاگہ غا بیران مس اندن اسہ چنا و عبدالقیوم پنی ءُ بندغ ئس بھاز ٹپی مسر۔
اندن سوراب آن حوال آک اریر کہ ٹماٹر آن پُر مزدا ٹرک پیماز آن پُر دہ ویلر ٹرک تون ڈک لگا۔ دا شکست ئٹ اِرا ایلم بیران مسر اندن مسہ بندغ ٹپی مسر۔ بیران مروکا ایلم تا تعلقدای قلعہ عبداللہ آن ءِ۔
لورالائی ٹی زمین تا چک و تاڑ آ اِرا ٹول نا نیام ئٹ سم کاری نا سوب آن رحمت اللہ، عبداللہ جان نا مار جاگہ غا بیران مس۔
نوشکی آر سی ڈی کسر آ کیشنگی آن خڑک تدوکا شام بروبکس گاڑی مون آن بروکا ویگو تون ڈک لگا ہرانا سوب آن ڈرائیور بیران مس اندن 16 بندغ ٹپی مسر، ہرافتیٹ زالبول و چناک ہم اوار ءُ۔
ٹپیک ٹیچنگ ہسپتال کن دننگانو۔ بیران مروکا ڈرائیور نا تعلقدای چاغی آن پاننکسہ ءِ۔
اینو دکی نا علاقہ جہندمی بائی پاس آ کولا مائنز نا ہند آن اسہ بندغ ئسے نا چاہنداری نا وڑ ئٹ مفروکا جون خننگانے۔
پولیس نا رد ئٹ 11 سال آن بند کانڑ ئٹ واپس کاریم تے بناء کننگ نا نیام نو سد فٹ کڑمبی آن اسہ بندغ ئسے نا چاہنداری نا وڑ ئٹ مفروکا جشوک آ جون خننگا ہرانا چاہنداری کن ڈی این اے ٹیسٹ ہلنگا ہراڑان گڈ جون ءِ مائنز قبرستان ئٹ کڈ کریر۔
بلوچستان نا ضلع ژوب ئٹ پکنک نا وخت دیر ئٹ ڈب ہلیسہ ورنا ئس مرگ نا گواچی مس۔
حوال تا رد ئٹ ژوب نا علاقہ قبرووند ئٹ پکنک نا نیام سمیع اللہ پنی ءُ ورنا ئس دیر ئٹ ڈب ہلیسہ بیران مس ہرانا جون سول ہسپتال ژوب ئٹ المی کاروائی آن گڈ خاہوت نا دو ٹی تننگا۔