کوئٹہ ٹی فزیو تھراپسٹ آتا تینا خواست آتیکن گورنر ہاؤس نا مونا تولوک برانز، ہراڑے نرینہ و زالبول فزیو تھراپسٹ آتا بھلو کچ ئس اوار مس۔
بلوچستان فزیو تھراپی ایسوسیشن نا کنڈ آن بلوچستان نا فزیو تھراپسٹ آک تینا خواست آتیکن جی پی او چوک آ تولوک برانز کریر، فزیو تھراپسٹ آک تدوکا 127 دے آن کوئٹہ پریس کلب نا مونا برانز کننگ ءُ، فزیو تھراپسٹ آک دوبہ خلکر کہ حکومت خواست آتے مننگ نا جاگہ آ پر امن برانز ءِ توننگ کن پولیس تا بھلو کچ ئسے ٹی بندغ تخانو۔
برانز کروک آتا تا پاننگ ئس کہ بلوچستان و ایلو صوبہ تا اسپتال آتیٹ دوا درمان ئٹ زمین و آسمان نا فرخ ءِ۔ بلوچستان آن گیشتر آ ناجوڑ آک چنکا ناجوڑی تیکن ایلو صوبہ تیا کارہ داٹی ہچو شک ئس اف کہ اوفتے داکان جوان جانجوڑی نا آسراتیک ایڑے رسینگرہ او آسراتی تیٹ خاص وڑ ئٹ جانجوڑی نا پڑ تون تعلقداری تخوک پروفیشنل عملہ ہرا ٹی فزیو تھراپسٹ ہرا لس جانجوڑی کن اسہ اہم ءُ کڑد ئس ایسری ایتک۔ ولے بلوچستان ئٹ دا شعبہ ءِ حکومت نا کنڈ آن ساندہ خنتے آن چپ کننگک۔
اوفتا پاننگ ئس کہ فزیکل تھراپی نا وڑ ئنا اہم و شعبہ ہرادے ننا صوبہ ٹی سوبری ئٹ ہلپسہ، داڑان بیدس ایلو صوبہ تیٹ ہیلتھ پروفیشنلز ڈاکٹر آف فزیکل تھراپی تینا خذمت آتیٹ جتاء ناجوڑی تا ایسری ءِ یخینی کننگ و اسہ جانجوڑ ءُ چاگڑد ئسے جوڑ کننگ کن تینا کڑد ءِ ایسری تننگ ءُ۔
بلوچستان فزیو تھراپی ایسوسیشن راہشون آک پاریر کہ ہیلتھ پروفیشنلز تا وڑ ننا اُست خواہی ءِ نن تینا صوبہ ٹی پوسکن آ آسراتی تیان آراستہ مریسہ تینا الس نا خذمت ءِ کننگ کین ہرا بھاز غریبی و دو ئنا تنکی آن بیدس دوا درمان کن ایلو صوبہ تیا کارہ۔ ولے صوبائی حکومت و اونا بے سوبر آ پالیسیک دا درشان کیرہ کہ صوبہ ٹی جانجوڑی نا باروٹ اوڑتون ہچو سوگو ءُ پالیسی اف۔
نن ( ڈاکٹر آف فزیکل تھراپسٹ) بھاز کوشست کرین کہ بیدس سڑک آتیا برانز و بین برانز آن صوبہ ٹی تینا کمیونٹی کن عزتی روزگار نا بند و بست حکومت ءِ منیفن ولے افسوز داڑے کوالخواک تینٹ خواہرہ کہ خوانندہ ورناک سڑک آتیا بریسہ بین برانز کیر۔
اوفک دا خواست کننگ ءُ کہ ایلو صوبہ تا وڑ ہیلتھ پروفیشنلز فزیو تھراپسٹ ڈاکٹر تیکن غُٹ ٹرشری کیئر، ٹیچنگ و ڈی ایچ کیو اسپتال آتیٹ اسامی ودی کننگ مرے۔ اندن فزیو تھراپسٹ ہاؤس آفیسر آک ہرا کوئٹہ ٹی جتاء اسپتال آتیٹ کلینکل پریکٹس کننگ ءُ اوفتے پیڈ ہاؤس جاب (stipend) تننگ مرے۔
خواست آتیٹ پاننگانے کہ پنچ سال نا ڈی پی ٹی ڈگری ہولڈر تیکن بنائی سلیکشن پالیسی اسہ سال نا کلینکل ہاؤس جاب نا بنیات آ مرے و سوشل ویلفئر ڈپارٹمنٹ بلوچستان نا غٹ کلمپلیسز آتیٹ فزیو تھراپسٹ تین اسامی تننگ مرے۔
اندا وڑ غٹ ڈی ایچ کیو و ٹیچنگ اسپتال آتیٹ فزیکل تھراپی و ریہبلیٹیشن سینٹر ٹہیفنگ مرے۔ ہراتم اسکان ننا بنیاتی خواست آک پورو متنو نن تینا برانز ءِ برجاء تخون۔