منگچر بازار نا ہند آ زالبول آک گیس نا بند کننگ نا برخلاف برانز کریر کوئٹہ کراچی کسر آ برانز تِریسہ کسر ءِ ہر وڑ نا ہن و بر آکن بند کریر، ہرانا سوب آن ہڑتوما پارہ غان سدا تا گاڑی و ہزار آ مسافر آک پھسنگانو۔
برانز کروک آک میڈیا ٹی شینک کروک بیان ئٹ پاریر کہ تیوہ و سال ئسے نا وخت آن زیات منگچر ٹی گیس نا تِننگ بند ءِ ہراٹی زالبول آتے کتِغ کننگ ئٹ سختی مننگ ءِ، یخ آک بننگ ءُ ولے دائسکان گیس پائپ لائن آتیٹ گیس کچا گیس نا گند ہم بننگ اف۔
اوفتا پاننگ ءِ کہ یخ آتیٹ دے پہ دے تُرندی مننگ ءِ، گیس نا تفرنگ آن بے وس آ الس ءِ سختی مننگ ءِ ایندھن نا ارٹمی دروشم ذرائع ایل پی جی گیس، پوغ و پاٹ غریب الس ءِ طاغت اف بہا ئٹ ہلنگ نا، نیاڑی تے کتِغ کننگ ئٹ زیات سختی مننگ ءِ۔ یخ آتیان چُناک، پیر انگاک بیمار مننگ ءُ، قدرتی گیس ہڑدے نا زند ئٹ خاص و المیّ گِڑا سے ہراڑان شاری تے محروم کننگانے، نیاڑیک بے وس مریسہ کسر تیا برانز کننگ ءُ، گیس تِننگ اسکان برانز برجاء مرو۔