سندھ ئنا علاقہ سکھر ٹی جَنی تا ویگن ٹرالر سیٹی ڈک لگا ، ہرانا سوب ٹی مسئ بندغ مرگ نا گواچی و دوانزدہ آن گیشتر ٹپی مسونو۔
تدینی نا حوال رسینگنگ آ پولیس و ریسکیو نا ٹولی ہمو جا آ رسینگار جون و ٹپی مروک آتے سول اسپتال سکھر آ دننگا ۔
پولیس کوالخواہ نا ردئٹ اِرا ایلم کلتار لال و اکشے کمار نا جَن ڈھرکی آ ہننگ ئس کہ گھوٹکی بھلا کسر آ ویگن و ٹرالر ڈک لگار ، تدینیٹی اسہ بندغ ئس ہند آ ساہ تس، اندن اسہ نیاڑی و اسہ بندغ ئسے نا کہنگ اسپتال ٹی درمان کننگ نا وخت مس ۔
اسپتال بست و بند نا پاننگ ئس کہ دائسکان 14 ٹپی مروک آتے اسپتال آ ہتنگانے ، ہرافتیٹ مسہ چُنا ہم اوار ءُ ، ٹپی مروک آتیٹ پنچبندغ نا حالیت خُلیس نا ءِ ۔
اسپتال بست و بند نا پاننگ ئس کہ مرگ نا گواچی مروک آتا چاہنداری خاتون پُھلی، مورلال و مووی میکر عدیل آن مسُنے ۔