بلوچستان اکیڈمی نا سروکی ٹی مُسہ دے ئی عطاشاد ادبی مجلس نا درو باقاعدہ بناء مس۔ بلوچ نوشتکار و دانشور یوسف گچکی،بلوچستان نا مسکوہی سر وزیر ڈاکٹر عبدالمالک بلوچ تون اوار فیتہ ءِ کاٹ کریسہ مجلس نا بناء ءِ کرے۔
بنائی وخت آ بلوچستان اکیڈمی تربت نا چیئرمین پروفیسر ڈاکٹر غفور شاد، ڈاکٹر نعمت اللہ گچکی، عبید شاہ، پروفیسر غنی پرواز،بجار بلوچ، اے ڈی سی کیچ تابش بلوچ، اے سی تربت بھرام سلیم، آل پارٹیز کیچ ئنا کنوینر خالد ولید سیفی و ایلو سیاسی، چاگڑدی وادبی بندغ آک ساڑی ئسر۔
عطاء شاد ادبی مجلس نا درو نا دے پنی آ ادیب و دانشور ڈاکٹر شاہ محمد مری، پروفیسر فاروق بلوچ، پروفیسر غلام رسول خالد،صوبائی مشیر پی ایچ ای لالا رشید دشتی، قاضی مبارک، غنی پہوال، ڈاکٹر بدل خان، اسحاق رحیم، ڈاکٹر فضل خالق، اسلم تگرانی،بھرام بلوچ، وہاب بلوچ، خلیل تگرانی، عارف حکیم، پروفیسر ندیم اکرم، ارشاد پرواز، میجر رسالدار اسماعیل خالق، خان محمد جانگچکی و ایلوفک اوار ئسر۔ دا وخت ورنا تون اوار زالبول تا اسہ بھلو کچ اس ہم ساڑی ئس۔
مجلس آن نیشنل پارٹی نا سروک ڈاکٹر عبدالمالک بلوچ، بلوچستان اکیڈمی تربت نا چیئرمین پروفیسر ڈاکٹر غفور شاد، پروفیسر صبوربلوچ، واجہ عبداللہ و ایلوفک تران کریسہ عطاشاد ادبی مجلس ءِ کیچ ئنا چاگڑدی و ادبی تاریخ ئٹ اسہ پاش ءُ ودکی اس پن تسر۔
اوفک پاریر کہ عطاشاد بلوچ ادب نا روشن ءُ پِن اس ئس اونا کذیت دے آ داخس بھلن کچ ئنا مجلس عطاشاد ئنا ادبی شرف آ جوانوٹیکی ئسے۔
بلوچستان اکیڈمی تربت نا کنڈ آن مُسہ دے ئی ادبی مُچی برجاء ءِ ہرا نا اولیکو دے اِرا کتاب نا مون پاشی مس دافتیٹ فضل بلوچ نا مٹکروک کسہ تا کتاب ‘منتخب بلوچی کہانیاں‘ و قدیر لقمان نا افسانہ نا کتاب ‘نمدی جاھے سربوت‘ اوار ءُ اوفتیا پروفیسر اے آر داد وشارف شاد تبصرہ کریر۔
مجلس ئٹ “عطاشاد یادوں کے دریچے میں” نا سرحال آ پینل ڈسکشن ئٹ ڈاکٹر نعمت اللہ گچکی، یوسف عزیز گچکی، بجار بلوچ وڈاکٹر فضل خالق ہیت کریر ہرا ٹی ممتاز یوسف ماڈریٹر ئس۔ پروفیسر غنی پرواز نا کسہ و اونا لائخی آ پینل ڈسکشن ئٹ پروفیسر ڈاکٹرآے آر داد، شرف شاد و محسن بالاچ بشخ الکر ہرا نا ماڈریٹر قدیر لقمان ئس۔
مجلس نا گڈیکو بشخ بلوچی خلقی شئر تیکن گچین کننگاسس، ہرا ٹی پہلوان عظیم کلاہوی و پہلوان شیر محمد تینا لائخی درشانیکریر اندن سرونز ئٹ ماسٹر عارف مزار و ایلوفک اوار مسر۔
مجلس ئٹ تیوہ پاکستان آن 30 آن زیات شینکار آک کتاب مُچی ہڈ تننگ ءُ ہرا ٹی اسہ اندازہ ئسے نا رد ئٹ اولیکو دے لکھ آتیٹ کتابآک بہا مسنو۔