بلوچستان نا ضلع کیچ آن پاکستانی لشکر نا دو آن ورنا نا زوراکی ئٹ بیگواہی نا بر خلاف خاہوت و ہندی بندغ آتا کنڈ آن سی پیکسڑک آ تولوک برانز آ استو پولیس جلہو کرینے۔
دی بلوچستان پوسٹ ءِ دوئی مروک ویڈیو ٹی خننگ مریک کہ بیگواہ زمان بلوچ نا یلہ مننگ کن تولوک برانزی تے برانز ءِ ایسر کننگ ناپاننگ ءُ اندن برانزیک ورنا نا یلہ مننگ اسکان برانز ءِ برجاء تخنگ نا ہیت ءِ کریسہ ءُ۔
اندا وخت ئٹ برانزی تیان خڑک ترند سم کاری بناء مریک واہم برانز کروک آک تینا برانز ءِ برجاء تخانو۔
خیال ئٹ مرے کہ درو آن زوراکی ئٹ بیگواہ زمان بلوچ نا خاہوت کیچ ہوشاپ نا ہند و سڑک آ ہڑاند بش کریسہ سڑک ءِ ہن بر کن بندکرینے۔
زمان بلوچ ءِ مُسہ دے مالو تربت آن پاکستانی لشکر دزگیر کننگ آن گڈ تینتون اوار دریسس ہراڑان گڈ او پاش کننگتنے ورنا نا زوراکیئٹ بیگواہی نا بابت پریس کانفرنس کریسہ خاہوت نا پاننگ ئس کہ سپاھان نا مار زمان ہرا کیچ ئنا علاقہ بالگتر نا ہندی ئسے اودے 10 فروری 2023 جمعہ نا دے تربت بازار آن زوراکی ئٹ بیگواہ کننگا و دائسکان اونا ہچو حوال اس اف۔
خاہوت پارے کہ دا اولیکو وار اف کہ زمان ءِ زوراکی ئٹ بیگواہ کننگانے بلکن داڑان مالو ہم زمان بلوچ و اونا ایلم ماجد بلوچ ءِ 9 جون2020 ئٹ سکیورٹی ادارہ غاک زوراکی ئٹ بیگواہ کریر ہرافتے شش تُو بے دادی نا گواچی کننگ آن گڈ یلہ کننگا۔ خاہوت پارے کہسکیورٹی ادارہ غاک چرجوئی تون ننا خاہوت ءِ خُلیفنگ ءُ و ننا خاہوت نا بندغ آتے ٹک کریسہ زوراکی ئٹ بیگواہ کننگ ءُ۔ خاہوت نا پینپاننگ ئس کہ زمان بلوچ نا زند ئنا بابت ننے بھاز خُلیس ءِ۔