بلوچستان نا ضلع لسبیلہ و خضدار ٹی کسر شکست آتیٹ اِرابندغ بیران و ہشت ٹپی مسونو ۔
لسبیلہ ٹی زیات مُج نا سوب آن رانا بھٹ نا ہند آ کار و کوچ نا نیام ئٹ ڈھک لگنگ نا سوب آن ہشت بندغ ٹپی و چُنک سن چُنا اس بیران مس ۔
وندر نا علاقہ رانا بھٹ نا ہند آ مین ایکو کسر آ زیات مُج نا سوب کار و کوچ ئٹ دک لگنگ آ کار ئٹ مروک 8 بندغ ٹپی مسونو اندن کار ٹی مروک 9 سالہ چُنا بیران مس۔
شکست تا حوال رسینگنگ آن وندر پولیس و ریسکیو 1122 نا عملہ ہمو جا آ رسینگار و تُدینی ٹی ٹپی مروک بندغ آتے کُمک کننگ آن گُڈ ریسکیو سینٹر وندر دننگار و زیات ٹپی مروک مُسہ بندغ نا گیشتر دارو درمان کِن کراچی ٹراما سینٹر آ گدریفنگار۔
اندن وندر پولیس تدینی ٹی مرگ نا گواچی مروک 9 سالہ چُنا نا جون ءِ کاروائی کننگ آن گُڈ خاہوت ءِ تس۔
ہمو وخت خضدار ٹی تُرند رفتار ٹریکٹر غلامانی چوک نا ہند آ ورنا ئسے گڈا تس۔ جون ءِ المی کاروائی کننگ کِن ہسپتال آ دننگا۔
وڈھ نا علاقہ دراکھالہ ٹی کان دڑا بُھس مریسہ اسہ مزور کار عبدالجیل بارانزئی پِنی بندغ اس مرگ نا گواچی مس ۔ مرگ نا گواچی مروک مزور کار نا تعلق دراکھالہ وڈھ آن پاننگ ءُ ۔
ایڑے تحصیل چھترتھانہ فلیجی نا حد ئٹ باوہ چُنک سن چُنا ءِ سُم ئٹ ٹِک کرے، چُنک سن چُنا زوراکی ئٹ برام کننگ آن نمن کننگ آن باوہ چُنا ءِ سُم کاری کریسہ کسفے۔ گیشتر پٹ و پول بست و بند کننگ ءِ ۔