براہوئی نا پنی آ صوفی شاعر تاج محمد تاجل نا یات اٹ بھاگ ناڑی ٹی اسے مچی اس اڈ تننگا۔
دا مجلس ٹی تاج محمد تاجل نا شخصیت و اونا کلام نا زی آ ڈاکٹر عبدالرزاق صابر نا مُچ کروکا مسے کتاب نا مون پاشی دود ہم مس۔
گوادر یونیورسٹی نا وائس چانسلر براہوئی ادب نا پنی آ زانت کار ڈاکٹر عبدالرزاق صابر دا مجلس نا کماشی ءِ کرے۔ مجلس ضلع کچھی نا شار بھاگ ناڑی ٹی بلوچی ادبی سنگت بھاگ و براہوئی ادبی سوسائٹی کوئٹہ نا اواری ٹی اڈ ہلک۔
ایلو مہمان آتیٹی عبدالقیوم بیدار، نزیر شاکر، سوسن براہوئی، شاہ بیگ شیدا، رحیم ناز و پین چندی شاعر و ادیب آن ساڑی ئسر۔
مجلس ٹی عبدالرزاق صابر نا پارہ غان تاج محمد تاجل نا فن، شخصیت و اونا کلام ءِ اسے جاہ کروکا مسے کتاب “کلیات تاج براہوئی” “کلام فقیر تاجل، سندھی و سرائیکی” و ” تجلیات، اردو” نا پن اٹ چھاپ و شینک مروکا کتاب آتا مون پاشی دود اڈ تننگا۔ اندن دا مجلس ٹی رفیق مغیری نا پارہ غان پنی آ سیاستدان ڈاکٹر عبدالحئی بلوچ نا زی آ چھاپ و شینک مروکا کتاب نا ہم مون پاشی مس۔
پنی آ زانت کار آک تاج محمد تاجل نا حوالہ ٹی تینا نوشتوک آتے خوانار، اوکان گڈ براہوئی بولی نا پنی آ شاعر حاجی شاہ بیگ شیدا نا کماشی ٹی اسے مشاعرہ اس ہم مس۔
مشاعرہ ٹی بلوچی، براہوئی ، سندھی، سرائیکی، اردو بولی ٹی شعر پاننگا۔ مشاعرہ نا اسٹیج سیکرٹری نا ذمہ واری تے براہوئی بولی نا شاعر و افسانہ نگار حسن ناصر دوئی کرے۔