روسی ملٹری بلاگر ولادلن تاتارسکے یک شمبے آ سینٹ پیٹرز برگ ئنا اسہ کیفے اسیٹ مروک بمب تراک ئٹ مرگ ئنا گواچی مس۔
بلاگر نا کہنگ روس ئنا ڈغار آ برجاء وخت ئٹ یوکرین جنگ ئتون تفوک ارٹمیکو اہم شخصیت نا کہنگ ءِ۔ بلاگر تاتارسکے نا اصل پِنمیکزم فومن ئس و اود روس ئنا فوج آن بھاز خڑک سرپد مننگاکہ۔ اندن روس ئنا پٹ و پول کروک کمیٹی بلاگر نا کہنگ نا پٹ و پول ءِ بناکننگ نا پڑو کرینے۔
تاتارسکے تینا ویڈیو تیٹ یوکرین آ روس ئنا جلہو ءِ جوان پاریکہ و بھاز ہند آتیا او روسی فوج ئنا قیادت آ نغدکاری ہم کریسس۔ ٹیلیگرام آ اونا فالوورز آتا کچ پنچ لکھ 60 ہزار آن زیات ءِ۔
حوال تروک ادارہ ‘رائٹرز‘ نا رد ئٹ ہلہلئی وڑ ئٹ دا سما تمتنے کہ بلاگر نا کسفنگ ئٹ دیر اوار ءِ واہم کیہی اہم روسی کوالخواک بیدساسہ وڑ ئسے نا شاہدی تننگ آن یوکرین آ دوبہ خلنگ ءُ۔ واہم روس ئنا پرائیوٹ ملیشیا نا سروک پارینے کہ “نن دا تدینی نا دوبہ ءِ یوکریننا حکومت آ خلپرون“۔
روسی وزارت خارجہ پارینے کہ اسہ صحافی ئسے نا کہنگ آ دے کہی ڈیہہ تا چھپی منافقی ءِ پاش کیک۔ ایلو پارہ غا یوکرین نا صدرولادومیر زیلنسکی نا ترجمان سینٹ پیٹرز برگ تراک ءِ روس ئنا تہہ ئنا دہشت گردی پِن کرینے۔
‘رائٹرز‘ نا رد ئٹ ‘تاس‘ پنی ءُ نیوز ایجنسی اسہ ذریعت اسیٹ دعویٰ کرینے کہ بلاگر تاتارسکے کیفے ٹی ساڑی منہ بندغ آتون ہیتکننگ ئس کہ ہموتم اودے اسہ بُت اس تننگا ہراٹی تراکی مواد ئس ہرا نا ترخنگ آن تاتارسکے مرگ ئنا گواچی مس۔
روس ئنا کانود ٹہیفوک ادارہ تون تفوک ‘میش‘ پنی ءُ ٹیلی گرام چینل اس اسہ ویڈیو اس شینک کرینے ہرا ٹی تاتارسکے نا دوٹی مائیکخننگک۔ ہمو وخت اودے اسہ کارندہ ئسے نا کنڈ آن مجسمہ اس ہم تننگک۔