کنا جند ہمو ئس
نوشت: جویریہ بلوچ
ای سال آتا شش و پنچ نا گواچی، کتاب آتے خوانیوہ کہ نوائے تینے رسینگو، تینا “جند” ءِ ہرا کنے آن گم و گار ءِ یا کہ سوختہ ءِ کنے آن، انت اس کہ ارے ولے ای، ای افٹ اخس مُر اُٹ تینے آن ہچ سماء اف، ای اخس تینے دا کوٹی ٹی بند کریٹ تنیا کریٹ ولے نا اومیت مسوٹ، بنگوسٹ کہ تنیائی ٹی بندغ تینتون ہمکلام مریک تینے پہہ مریک کہ ای انتسے اُٹ دیر اُٹ، ولے ای تینے اخس تنیا کریٹ ہموخس شش و پنچ نا گواچی مسوٹ، تنیائی آن کنا مِلی ٹی اندنو توار توار اس بش مس کہ ای او توار نا نیام ئٹ اخس رُمب کریٹ دُودینگاٹ تینے سر متوٹ بلکن گیشتر تینے آن بیگانہ مریسہ ہناٹ۔ دا ہر ساہت ئنا توار توار کنے گنوک کیک ای ہربشی مریوہ تینے آن تینٹ نرّنگ کن اُست خوائک۔ ولے داسہ اسہ پین کسر اس آزموندہ کیو؟ نوائے ہموکان “کنا جند” کنے رسینگہ۔
اندنی تون کوٹی نا در ئنا توار کنے کنا خیال آتیان ہجم تس و ای سار آ بسوٹ۔ و ای کتاب نا پارہ غا اُراٹ کہ کتاب ئٹ دوک کنا اندن سخت ءُ کس پائے کتاب نرک کنے آن، ای دو تے تینا ملاٹ و کتاب ءِ آجو کریٹ تینا کوزہ آن، ہراتم ای پیشن نا توار آ پام تسوٹ گڑا سماء تما کہ تہو اندن ترند ءِ ہرا نا سوب دریچہ و کوٹی نا در اندنو توار اس کننگ ءُ ہرافتیان بھیم تالان مننگ ءِ کوٹی ٹی۔ اندن گمان مسکہ کہ دا ترند آ تہو تُنگان و بے سار آ بندغ تے بش مننگ کن ہکل تننگ ءِ، ہورّہ غاتا تراک تراکارہ خف تیٹ پِننگ ئس، گروک آتا رژنائی دریچہ اسکان بریسہ ایسر مننگ ئس۔ ای خُلیس نا گواچی مسوٹ اسیکہ وا سوچاٹ کہ دیخہ پیشن کاو و اُریو کہ مُد امرے پِر مننگ ءِ یا بیرہ ہورہ غاکو۔
ہراتم ای پیشن پیش تماٹ و دا خنیسہ گوڑینگاٹ کہ ہتم نا بننگ نا خوشی ٹی سہیل ئٹ تموک بارُن پَن آک اسہ محفل اس ہڈ تسونو ہرا ٹی تہو ساز و زیمل نا کڑد سر تننگ ءِ، گروک آک دا محفل ئٹ رژنائی تالان کننگ ءُ و ہورہ غاک ہکل تننگ ءُ مخلوق ءِ کہ بش مبو ہتم بسونے۔ ای اُراٹ بارن پن آتا پارہ غا او اندن گل و بال و ناچ ئٹ چٹ گوہنگاسر، مننگ کیک دا سوب آن کہ اینو نا ہتم اوفتا سوب آن بسونے اندا ئسر ہرا قربانی تسر دا پوسکنا ہتم کن، درخت آتیان لڑیسہ تمیسہ ندر مسر۔
ولے ای خناٹ کہ ہتم ئٹ پوسکن خرّوک آ نہال آک خوش خننگتورہ او گوڑینگوک ئسر، پَن آتے گل و بال ناچ کننگ آ خنیسہ گوڑینگاسر بلکن او ہم کنا وڑ سوچ خلنگ ئسر کہ دن امر مننگ کیک کہ کس تینا کہنگ و ایسری آ داخس خوش مرے مگہ مرگ زند ئنا پِن ءِ ؟ اگہ اف گڑا دا انتکن داخس خوش ءُ ؟ بیرہ اندا پوسکن بروک آ ہتم کن ؟ مننگ کیک بھلو وخت اس ودار ئٹ مریر اندا دے ئنا، ہچ مِلی کاریم کپک کہ انت کسہ ئسے ؟ ای نہال آتا حالیت ءِ خناٹ مونجا مسوٹ کہ دافک ہم کنا حالیت نا گواچی ءُ و بارن پن آک امرو خوش بخت ءُ کہ تینے سرپد مسونو، تینا جند ءِ۔ کہنگ آن گڈ ہم زندہ ءُ تینا پدریچ ئنا نیام ئٹ گل و بال ءُ۔
بارن پن آتے اُریسہ ہچ سماء اف کہ ہرا وخت کنا خنک اوار تماسر ای سماء کریٹ کہ سہب تمانے ٹک تسونے، دانگ اینگ اُراٹ محفل ایسر مسوسس گروک و ہورہ غاتا ڈس الو، ای تنیا تولوک ئسوٹ و ناگمان آن استو نا ندارہ کنا خن تا مون آ پیری کننگ ءِ بناء کرے، ہمو سوج آک دوارہ کنے ہربشی کریر ای زو بش مسوٹ ہمو کسر ءِ آزموندہ کننگ کن تینا جند ءِ پٹینگ کن تنیائی و کتاب آتا جاگہ غا مَش تا پارہ غا مون کریٹ، ای اندن تدینگسہ ہننگ ئسوٹ کس پائے او کنا ودار ئٹ توسونے۔
کس تینے آن بے تعلقدار مرے و تینا جند و تینے پہہ مف گڑا زند بھاز سخت مریک، انتئے کہ ایسکان کس تینا جند ءِ پہہ متنے او تینا زند ئنا مسخت ءِ ہم پہہ مفک، دا نیام ئٹ کیہی سوج آک بندغ ءِ بے جارات کیرہ و اندا حالیت ئس کنا۔ ای گام تے ترندی ئٹ ارفیسہ بڑز اُراٹ دے دیخہ بڑز بسوسس، اُشکنو تہو اس ہم چلنگ ئس داسہ مش ہم کنے آن خڑک ئس، امر کہ ای مش ءِ سر مسوٹ دیخہ مُستی ہناٹ و کسر آ تنیا تولوک اسہ بندغ اس خناٹ ہرا نا پژہ غاک یلہ گُد اسہ کوپہ غا و نیمہ تا ڈغار آ تموک ئس۔
ای رہی آ تا ہناٹ سلیسوٹ، او خل اس ارفیسس ڈغار ءِ کُریسہ ئس، اوڑان سوج کریٹ: “نی انتئے داڑے کسر آ تنیا تولوک اُس حالیت نا انتئے دن ءِ؟” او ہچ ورندی تتو۔ ای اودے خوڑتی ئٹ اوننگ بناء کریٹ اونا پژہ غاک نیمہ آن زیات پیہن ئسر و ای اونا چہرہ ءِ اوننگ نا کوشست کریٹ ولے بےسہب مسوٹ انتئے کہ اونا چہرہ ءِ پژہ غاک ڈھکاسر۔ ای الاٹ تا تینا سفر کن رادہ مسوٹ دیخہ مُستی ہناٹ او کوکار کننگ ءِ بناء کرے ای چائسوٹ کنا سلنگ و سوج کننگ نا اودے سماء تمتنے۔
کنا گامک ترند ئسر او کوکار ئٹ پاریسہ ئس: “بر اینو مون پہ مون مرین اسہ مجلس اس کین، بر ای پاوہ نے نی انتئے بےجارات اُس، بر کنتون نا ہر سوج ئنا ورندی ارے، ہئو! نی کتاب آتے خوان علم مُچ کر ولے تینے پہہ مننگ کن پیشن پیش تم تینا ڈغار و مخلوق ءِ اُر، تنیائیک نیکن جوڑ افس دا مخلوق ئتون نی تینے خنوس دا بندغ آک نے نا جند ئتون اوڑدہی کرفور، انداڑے نا مسخت نے رسینگو۔”
ای اوڑا ہچ پام تتوٹ انتئے کہ وخت ءِ زوال کننگ خوائتوٹہ، ای ہنیسہ ئسوٹ و داسہ اونا توار ہم ایسر مریسہ ئس کنا مُر بننگ نا سوب آن، ای تیوی مش ءِ پیری کریٹ ولے بےسہب مسوٹ و بیوس مریسہ چیہانٹ اس خلکوٹ انداڑے کنا گوڈ آک ڈغار ئٹ لگار کنا اُست پاریکہ کہ دا مش ءِ تینا حالیت نا بابت پاو ولے اُراٹ کہ وخت ہنانے ٹاک نیمروچ مسونے، ای بش مسوٹ و ہمو تنیا غا کوٹی کن سر ہلکوٹ۔
نا اومیت و دم درینگوک آ نت تیٹ پدا بننگ ئسوٹ، کوٹی خڑک ئس، داسہ ہمو نا ہیت آک کنا مِلی ٹی پیری کننگ ءِ بناء کریر، ای سرپد مسوٹ کہ او کسر آ کنا ودار ئٹ تولوک ئس۔ اونا دا ہیت آک کنا خف تیٹ پِننگ ئسر کہ: “بر اینو مون پہ مون مرین، بر ای پاوہ نے نی انتئے بےجارات اُس، پیشن پیش تم تینا ڈغار و مخلوق ءِ اُر، دا بندغ آک نے نا جند ئتون اوڑدہی کرفور، انداڑے نا مسخت نے رسینگو۔”
ای پہہ مسوٹ، کنے کنا سوج آتا ورندی رسینگا، انتئے کہ ای ہرا سوج آتے پٹینگ کن پیش تماسٹ او ہمو سوج آتا ورندی تے پاننگ ئس۔ ای پہہ مسوٹ کہ “کنا جند ہمو ئس” ای گل و بال مسوٹ کنا اُست پارے کہ کاو اوڑتون مون پہ مون مریو، ای چک ءِ ہڑساٹ،،،،،
ولے
او الو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔