کینیا نا پنی آ نوشتہ کار و نغدکار نگوگی وا تھیونگو 87 سال نا سن ئٹ کذیت کرے۔ نگوگی نا نوشت آک کینیا ٹی برطانوی کوزہ و آزاتی آن پد کینیا نا چاگڑد ہڑتوم آتیا نغد کریرہ۔
نوشتہ کار نا کذیہ ءِ اونا مسڑ پک کریسہ فیس بک آ نوشتہ کرے کہ ”نن تینا اُست آ خل اس تخسہ تینا باوہ نگوگی وا تھیونگو نا کذیت نا پڑو ءِ کینہ۔“
”او تیوہ ءُ زند اس گدارا، جوانو جنگ اس کرے۔“
2019 ئٹ نگوگی نا اُست نا مُسہ وار بائی پاس سرجری مسوس و 1995 ئٹ کینسر نا ہم گواچی مسوسس واہم اوکان پد او جانجوڑ مسوسس۔ کہنگ نا وخت نگوگی گمانی بِک آتا ڈائیلاسز نا درمان کرفنگ ئس، واہم اونا کذیہ نا سوب دائسکان سماء تمتنے۔
نگوگی 1938 ئٹ کینیا ٹی ودی مس، اونا ودشت پِن جیمز نگوگی تخنگا، او افریقہ نا کل آتیان اہم پوسٹ کالونیل نوشتہ کار آتا دروشم ئٹ یات تخنگو۔ نگوگی نا بنائی زند نا بنائی تدینی تیٹی ماؤ ماؤ جنگ اوار ئس ہرا 1950 نا دہائی ٹی کینیا ئٹ برطانوی کوزہ نا وخت مسوسس۔
نگوگی نا نوشت آک برطانوی نوآبادیاتی وخت و 1963 ئٹ کینیا ٹی آجوئی آن پد مروک پوسٹ کالونیل چاگڑد کن اسہ ڈول نغدکاری ئسر۔
1977 نگوگی نا زند و ئٹی بھلو بدلی اس ہیس ہراتم او انگریزی ٹی نوشتہ کننگ نا جاگہ تینا بولی Kikuyu ٹی نوشتہ کننگ نا فیصلہ کرے و تینا ودشت پِن جیمز ءِ کشیسہ تینا پِن ءِ نگوگی وا تھیونگو کرے انتیکہ او کالونیل زہم آن پاک ءُ پن اس خواہاکہ۔
اونا پِنی آ کتاب آتیان اسٹ ”Decolonising the Mind“ نوزدہ سد و شست و شش ئٹ ہموتم شینک مس ہراتم او پیشن ڈیہہ ئٹ رہینگاکہ۔ پن کروک کتاب دلیل ایتک کہ ”ظالم آتا بولی ءِ کاریم ئٹ ہتیسہ تینے آجو کننگ ناممکن ءِ۔“
پنی آ نوشتہ کار مننگ نا ہند ءِ دوئی کننگ آن بیدس نگوگی ضمیر نا بندی اس ئس۔ 1977 ئٹ کینیا ٹی اودے اسہ ڈرامہ اس مونا ہتنگ نا ڈوہ ئٹ جیل کننگا انتیکہ اونا ڈرامہ ءِ ہمو وخت ئنا چاگڑد کن نغد اس تکنگا۔
او اسہ وار اس ڈیہہ ئنا پوسکنا بڑزکو تپہ ءِ ”امیت آتا مرگ، تغ تا مرگ، و زیبائی نا مرگ“ نا ڈول ئٹ بیان کریسس۔
1982 ئٹ نگوگی تینا باوہ پیرئی ڈیہہ ئٹ ٹھیٹر و پرفارمنس آ رکھ آن پد جلاوطن مریسہ برطانیہ و پدا امریکہ غا ہنا، ہراڑے او یونیورسٹی آف کیلیفورنیا اروائن ئٹ پروفیسر نا دروشم ئٹ کاریم کرے۔ او کینیا نا بابت نوشت، یادداشت، و ناول نوشتہ کننگ بنا کرے۔