بلوچستان نا دارالحکومت کوئٹہ ئٹ بلوچ زالبول صحافی آمنہ پناہ نا کتاب نا مون پاشی و اونا یات اٹ دے ہڈ تننگا۔
پاکستان مسلم لیگ (ن) نا راہشون و مسکوہی اسپیکر بلوچستان اسمبلی راحیلہ حمید خان درانی، ظہور شاہوانی ایڈووکیٹ، منیر بلوچ، وحید ظہیر، افضل مراد، صائمہ ہارون، ڈاکٹر عنبرین مینگل، ڈاکٹر طاہرہ کمال، یار جان بادینی گودی آمنہ پناہ بلوچ نا کتاب ”کاسہ آب“ نا مون پاشی نا دود و ریفرنس نا ردئٹ یک شمبے نا دے کوئٹہ پریس کلب ئٹ ہڈتروک مجلس اٹ خیال آتا درشانی کریر۔
اوفک پاریر کہ بلوچستان کوْن آ ماندہ و قبائلی علاقہ ئٹ مڈی و آسراتی تا کمبوتی آن گڈ ہم گودی آمنہ پناہ صحافت کوْن آ پاک آ کاریم ءِ گچین کریسہ بلوچستان نا زالبول تا حق و ہند ءِ دوئی کننگ کن تینا قلم و کتاب آن کوشست کریسہ ہرا کڑد ءِ ایسری تسونے او کس آن ڈھکوک اف، او ایسری ساہ اسکان کتاب آتیون دوستی تخیسہ دا کوڑی ءِ یلہ کرے۔
اوفتا پاننگ ئس کہ اونا کاریم ءِ مستی دننگ کن ننے تینا کڑد ایسری تروئی تمو، ادب تون ہمگرنچ مریسہ اسہ گچین ءُ چاگڑد اس ٹہیفنگ مریک۔
مجلس ئٹ تران کروک آتا پاننگ ئس کہ بلوچستان نا ڈیہہ پنی ءُ بندغ ودی کرینے ہرافک جتا تلہ غاتیا تینا لائخی تا سوب تینکن پِن و ہند دوئی کرینو، اندن گودی آمنہ پناہ بلوچ بلوچستان نا اولیکو زالبول صحافی تیٹ گچین ہند اس تخک۔ آمنہ پناہ زالبول تے لکھنگ و خواننگ ءِ عیب سر پد مروک دود آتے لتاڑسہ لکھنگ و صحافت ءِ مستی دننگ نا باریم ءِ ارفے۔
اوفک پاریر کہ آمنہ پناہ دئے سال اسکان کینسر کوْن آ مرض ئتون مونتس، اونا زند اسہ گچین مثیال ئسے، نن تینا ادیب آتیتون دنو خذمت کروک بندغ آتے بے خیال کپن بلکن اوفتا کاریم ءِ مُستی دریسہ مخلوق اسکان سر کین۔
مجلس اٹ اونا کتاب نا مون پاشی کننگا و اوڑکن دعا خواہنگا۔
