بھارتی ریاست مہاراشٹرا ٹی بس ئٹ خاخر لگنگ آن 25 بندغ بیران و 8 بندغ ٹپی مسر۔
پیشن ملکی حوال تروک ادارہ ‘رائٹرز’ بھارتی اے این آئی نیوز ایجنسی نا بابت پارے کہ بس یاوتمال آن پونے آ ہننگ ئس، ہرا ٹی 32 بندغ سوار ئسر۔
بلڈھانہ نا ضلع کلکٹر ڈاکٹر ایچ پی تمموڈ اے این آئی ءِ پارے کہ تدینی ٹی 25 بندغ کسکنو، ہرافتا چاہنداری مننگ ءِ۔ او گیشتر پارے کہ ڈی این اے نا ذریعت ئٹ چاہنداری آن گڈ جونک خاہوت آتا دوٹی تننگور۔
بھارتی سر وزیر نریندر مودی اسہ بیان اسیٹ پارے کہ بلڈھانہ ٹی بھیم بش کروک تدینی آ اُست ہسون مس، کنا دعاک کہوک آ بندغ تا خاہوت آتیتون اوار ءُ۔ اونا پاننگ ئس کہ ہندی بست و بند زیمی تے کمک کننگ ءِ۔
خیال ئٹ مرے کہ 2 جنوری 2023 آ بھارت نا ریاست اوڈیسا نا ضلع بالاسور ئٹ مسافر ریل تا تدینی ٹی 50 بندغ کسکسر و 300 بندغ ٹپی مسوسر۔
برطانوی حوال تروک ادارہ ‘رائٹرز’ نا رپورٹ نا ردئٹ اوڈیسا نا ضلع بالاسور ئٹ مسافر ریل پٹڑی آن دڑیسہ مال گاڑی تون ڈک لگاسس، ہرا نا سوب آن مرک آک مسر اندن ٹپی آتے اسپتال آ دننگاسس۔ دے کہی بنگال نا چیف سیکریٹری ایچ کے ڈیویڈی صحافی تے پاریسس ریل ئنا ڈک لگنگ ‘گندہ ءُ تدینی’ ئسے۔