موبائل فون ننا زند نا اسہ اہم ءُ بشخ اس جوڑ مسنے و انٹرنیٹ نا 24 گھنٹہ مننگ نا سوب ورنا غا زنک دے و نن موبائل فون ئٹ اختہ ءِ۔
ننا جہان ئٹ موبائل فون ءِ ننکان اُرے اسکان اوننگ اسہ پوسکنو رواج یا ٹرینڈ اس جوڑ مسنے، واہم انت نم چارے کہ موبائل فون ءِ ننکان اُرے اسکان کاریم ئٹ ہتنگ بندغ نا ذہنی جانجوڑی ءِ امر زیمی کیک؟
دا رِدئٹ ئٹ فوٹو اینڈ شیئرنگ پلیٹ فارم انسٹاگرام آ سٹینفورڈ یونیورسٹی نا پروفیسر و ماہر نیورو بائیولوجی اینڈریو ڈی ہیوبرمین نا ویڈیو تالان ءِ ہرا ٹی او پائک کہ ننکان اُرے اسکان موبائل فون کاریم ئٹ ہتنگ آن ڈپریشن مریک۔
پروفیسر اینڈریو ڈی ہیوبرمین پائک کہ ‘نمے جوان لگے یا نہ، دا جرنل سیل ئٹ شینک مسوسس کہ نن ئنا 11 بجہ غان سہب نا 4 بجہ اسکان اسکرین ٹائپ لائٹ (یعنی موبائل یا لیپ ٹاپ ءِ کاریم ئٹ ہتنگ) نا خن تیٹی لگنگ آن مِلی نا بشخ ہیبین نولا ٹی اسہ اندنو سرکٹ اس ودی مریک ہرا ڈوپامین (مِلی ئٹ ودی مروک اندنو کیمیکل اس ہرانا سوب نن جارات یا خوشی محسوس کینہ) ءِ کم کیک و اُسٹ کٹی ءِ ودفک، اندا خاطران دن کننگ آن ڈپریشن ودک۔’
دا بابت 2018 ئٹ برطانوی اخبار دی انڈیپینڈنٹ ہم اسہ پٹ و پول اس شینک کریسس ہرا ٹی دا ہیت پاش مسوسس کہ نن ئٹ اُرے اسکان موبائل کاریم ئٹ ہتنگ آن ذہنی ویل آک ودی مریرہ۔
دی انڈیپینڈنٹ نا ردئٹ ’91 ہزار بندغ آ کننگوک دا پٹ و پول نا ردئٹ دا ہیت مونا بسنے کہ نن آن ہلیس گوربام اسکان تینا جاراتی آ بالشت آ لیٹوک انسٹاگرام و ٹوئٹر اوننگ آن ڈپریشن، بائی پولر ڈس آرڈر و نیوروٹیسز کون آ ذہنی ناجوڑیک ودی مریرہ۔’