جاپان اٹ براہوئی زبان
نوشت: جعفر قمبرانی
دی بلوچستان پوسٹ
منا دے مُست ڈان انگلش اخبار اٹی نوشتکار، ریسرچر و ڈکشنری لکھوک و زبان تا زیہا کاریم کروک رؤف پاریکھ نا اسہ آرٹیکل اس براہوائی زبان نا زیہا خناٹ ہراٹی یونیسکو نا رپورٹ آتا حوالہ تریسا او ہم ننا زبان ءِ مرک آن خڑک انگا زبان تیان اسٹ اس پاریسس ولے دانا متکنی و دانا خالصی آ ہم ہچو شک ئنا گنجائش ہلیتویسس۔ دا ہیت خوشی نا ہم ئس ولے فریشانی نا ہیت اس ہم تو ئسک کہ خدا کپ ننا ہنین آ زبان ننا دو آن کائے۔
ہندا مونجائی ٹی اِرا دے آن پد سوشل میڈیا غا اسہ ویڈیو اس وائرل مس ہراکہ ہر بلوچ نا است ءِ خوشی آن شپ کرے کہ جاپان اٹ اسہ اسٹوڈنٹ اس براہوائی ٹی ہیت کریسہ خننگاکہ۔
سما تما کہ ڈاکٹر لیاقت سنی صاحب ہراکہ دا وخت آ جاپان ٹی لسانیات اٹی پوسٹ ڈاکٹریٹ نا ڈگری نا خاطران ہنانے، براہوائی زبان کن کوشست کریسا اودے جاپان نا اِرا پنی آ یونیورسٹی “ٹوکیو یونیورسٹی و ٹیوکیو یونیورسٹی آف فارن اسٹڈیز” ٹی خوانیفنگ نا منظوری ہلکنے و اولی سیمسٹر نا ایسری آ چنا تا دلچسپی و شوق آن پر انگا دوی اٹ تینا ہنین آ زبان ءِ بننگ و سوشل میڈیا نا ذریعہ ٹی ایلو مخلوق ءِ بنفنگ نا شرف دوئی کرے۔ جاپانی اسٹوڈنٹ Koya kawade اس ہراکہ براہوئی ٹی تران کریکہ۔
یات سلے ڈاکٹر لیاقت سنی صاحب بلوچستان یونیورسٹی نا براہوائی ڈیپارٹمنٹ ئٹی ایسوسی ایٹ پروفیسر ءِ و براہوئی ڈیپارٹمنٹ نا چیئرمین ہم مسنے۔ و پین ہم ادبی ءُ کاریم بھاز سر تسنے۔ ڈاکٹر نا کوشست آتیان براہوائی زبان اینو ایشیاء نا دے ٹک اسکان سر مس یخین اٹ دا کاریم مونی ہم ہندن برجا سلو۔
دانا بابت نن تینا دلچسپی و مخلوق نا آگاہ کننگ نا خاطران لیاقت صاحب آن دا کوشست نا باروٹ گڑاس سوج کرین ہرا بھاز دلچسپ ئسر۔ یوسف عجب صاحب نا کمک و مدت اٹ اول تو دا ویڈیو ولائت اٹ تالان مس ارٹمیکو لیاقت صاحب آن پین ہم سما تما ہراتم کہ اوڑان سوج کرین کہ؛
1) جاپان اٹ براھوائی خوانوکا چنا تا تعداد اخس ءِ تو اونا ورندی ننے گوڑیفے کہ اول سر آن اوفتون 40 اسٹوڈنٹ براہوائی ہیل کننگو۔
ہندا چل ءِ ذہن اٹ تخسا ننا ذہن اٹ سوج بس کہ
2) آیا دا چل مونی تینا ملک (جاپان) اٹ براہوائی خوانیفنگ نا لائخ مرور یا خوانیفور ہراڑان ننا زبان پین تالان مریسہ ہنو؟ تو ڈاکٹر لیاقت صاحب نا ورندی پین ہم گل آن بال کروک ئس کہ “جی آؤ دا کل اسٹوڈنٹس آک لینگیوسٹک و لسانیات نا اسٹوڈنٹ ءُ ہراکہ مالو ہم اردو، فارسی و ہندی ہیل کرینو۔ دافتا کاریم ہی زبان تا زیہا کاریم و خواننگ وا خوانیفنگ ءِ۔
3) مسٹمیکو داکہ نن ڈاکٹر سنی صاحب آن سوج کریں کہ اونا جاپانی اسٹوڈنٹس آک بلوچستان نا بھلا علاقائی زبان نا خواننگ اٹ اخس دلچسپی ہلکر؟ یا دا نا زیہا اوفتا انت ردعمل مس؟ تو ڈاکٹر ورندی تریسہ پارے کہ براہوئی اوفتے کن اسہ پوسکن ءُ زبان اس ئسک ہرادے کہ او اولی وار بننگ ءُ۔ ہندا خاطران دا اوفتیکن بھاز دلچسپ ئسک ولے ہاں، دا ہیت ارے کہ لسانیات نا چنا تیکن ہم زبان تا تینا تینا خصوصیت آتا سوب آن او دادے دراوڑی و ارین زبان تون خڑک خنار۔
4) گڈیکو سر اٹ نن سوج کرین کہ براہوئی ہم تو اسہ زوال نا خڑک و کہنگ والا زبان اس پاننگک گڑا نما دا کریم و کوشست آن پد نما خیال براہوائی زبان نا زوال پزیری نا بارواٹ انت ءِ؟
ڈاکٹر لیاقت صاحب ورندی تریسہ پارے کہ اگہ اینو پگہ اسہ زبان اس ڈیجیٹلائزڈ مرے تو اونا زوال اٹ ہننگ نا چانس آک کم مریرہ۔ ڈاکٹر پارے کہ او ہندا جاگہ نا اسہ پروفیسر ئسے نا کمک اٹ براہوئی نا اسہ ڈیجیٹل ءُ 700 صفحہ نا ڈیٹا اس جوڑ کرینو ہراکہ ہارڈ و سافٹ ہڑتوما دروشم تیٹی مخلوق ءِ رسینگک گڑا ہندا نا سوب آن پیشن ملک نا مخلوق براہوائی زبان آ کاریم کننگ کیک۔
او پارے کہ دنیا ٹی براہوئی لسانیات آ کاریم کننگ تو بھاز آک خوارہ ولے اوفتے تون ڈیجیٹل دنیا ٹی براہوائی نا لوز کم ارے یا تو اسل افک۔ دا اولیکو وار ءِ کہ نن براہوائی نا لوز اتا اسہ ٹیکسٹ اس جوڑ کرین و داکان مست مخلوق ہراکہ براہوئی نا زیہا کاریم کننگ خواہیسنو گڑا او ڈینس برے نا کاریم تیان کمک ہلکنو۔
داڑان بیدس، ڈاکٹر ورندی تریسہ پارے کہ ای و ہمو پروفیسر (کمک کار) براہوائی گرائمر آ ہم کاریم بنا کرینن و ہندا ردٹ ننا اسہ سبخ (chapter) اس آکسفورڈ یونیورسٹی نا دراوڑی زبان نا ٹیکسٹ بک نا اسہ پریس ئٹی شائع مننگ کن ہم منظور مسنے۔
لیاقت سنی صاحب مستی پارے کہ ہمو زبانک ہرافتا تینا ہچو املا (لکھائی نا نظام) اس افک گڑا ہموفک کہنگ نا خڑک والا زبان تکنگرہ۔ او پارے کہ براھوائی ہم گمانی ہندنو زبان ئسے۔ ہندا خاطران ڈاکٹر تینا کاریم تا ورندی تریسہ پنت شون کرے کہ دا ننا زمواری ءِ کہ بروکا وخت اٹی تینا زبان آ کاریم کین و دادے کہنگ آن بچفن۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔