کوئٹہ ئٹ سم کاری نا اسہ تدینی اسیٹ مسکوہی سر وزیر بلوچستان نواب اسلم رئیسانی نا ایلم نا مار نوابزادہ ہارون رئیسانی و اونا سکیورٹی کارندہ تون اوار مُسہ بندغ مرگ ئنا گواچی و مُسٹ ٹپی مسر۔
ڈائریکٹر جنرل فوڈ اتھارٹی بلوچستان نعیم بازئی اردو نیوز ءِ پارے کہ نوابزادہ رئیسانی بلوچستان فوڈ اتھارٹی ٹی ڈپٹی ڈائریکٹر ئس۔ اودے سرکاری ڈیوٹی نا وخت کسفنگا۔
ایس پی سریاب ضیاء مندوخیل نا ردئٹ تدینی استو ننکان کوئٹہ نا علاقہ سریاب روڈ آ اسہ بس ٹرمینل ئسے آن خڑک مونا بس ہراڑے نوابزادہ ہارون رئیسانی فوڈ اتھارٹی افسر نا دروشم ئٹ چھاپہ خلنگ کن بسوسس۔ او جوس و کُنوکو گڑا بہا کروک دکان تا جاچ ءِ ہلنگ ئس۔
او پارے کہ ہارون رئیسانی بس ٹرمینل آن خڑک اسہ دکاندار ئسے ڈنڈ کرے گڑا ہموڑے ساڑی بس ٹرمینل نا خواجہ نا مار میر برامداد لہڑی تون اوفتا بد رد مس۔
ڈی جی فوڈ اتھارٹی نعیم بازئی نا ردئٹ نوابزادہ ہارون رئیسانی ءِ کار سرکار ئٹ مداخلت کننگ وخت آ توننگا ہرانا سوب بد رد مس۔ ہارون رئیسانی تون اوار اسہ سرکاری رکھوک کارندہ اس ہم ئس۔ ہڑتوم آتے سرکاری ڈیوٹی نا وخت ٹک کننگا۔
بلوچستان پولیس ترجمان نا ردئٹ بد رد کننگ وخت آ برامداد لہڑی ہارون رئیسانی ءِ چپانٹ اس خلک ہرانا سوب اونا سلہہ بند بندغ برامداد ءِ سم اس خلک۔ اوکان گڈ برامداد نا سیال آک ڈپٹی ڈائریکٹر فوڈ و اونا رکھوک لیویز کارندہ ءِ کسفیر۔
تدینی نا پٹ و پول ءِ کروک اسہ پولیس کارندہ اس پِن پاش کپننگ نا شڑط آ پارے کہ خن خنوک شاہد آک پولیس ءِ پارینو کہ دکان آن انڈین ساختہ پان پراگ رسینگاسس ہرانا سوب ہارون رئیسانی اوفتے 15 سد روپئی ڈنڈ کرے۔
او پارے کہ بس ٹرمینل نا خواجہ غاک اثر دار بندغ ءُ ہرافک کرایہ غا تروک تینا دکان تیٹ فوڈ اتھارٹی نا کارروائی آ بے وڑنگ نا درشانی کریر۔
ایس پی سریاب نا ردئٹ بد رد کننگ آن ہیت جنگ اسکان سر مس۔ دا وخت ئٹ نوابزادہ ہارون رئیسانی نا سرکاری رکھوک لیویز کارندہ و بس ٹرمینل نا خواجہ و اوفتا محافظ آتا نیام ئٹ سم کاری مس ہرانا سوب مُسہ بندغ نا مرک مس۔ کہوک آتیٹ نوابزادہ ہارون رئیسانی، اونا رکھوک کارندہ لعل محمد سومرو اندن ایلو ٹولی نا میر برامداد لہڑی اوار ءِ۔
برامداد لہڑی بس ٹرمینل نا خواجہ پِنی آ ٹرانسپورٹر قبائلی راہشون میر فیروز لہڑی نا نواسہ و بلوچستان نا تیوہ غاتیان بھلا ٹرانسپورٹ کمپنی سدابہار نا خواجہ دولت لہڑی نا مار ئس۔
نوابزادہ ہارون رئیسانی مسکوہی سر وزیر بلوچستان نواب اسلم رئیسانی و مسکوہی سینیٹر نوابزادہ لشکری رئیسانی نا ایلم نا مار اندن نوابزادہ اسد اللہ نا بھلا مار ئس۔ او منہ وخت مُست بلوچستان ہاکی ایسوسی ایشن نا صدر ہم گچین مسوسس۔
ایس پی سریاب نا ردئٹ دا اسہ قبائلی دژمنی یا ڈغار نا جیڑہ اس اف بلکن ہند آ بد رد کننگ نا سوب آن مروک جنگ ئنا نتیجہ ءِ۔ او پارے کہ دا دائسکان سماء اف کہ سم کاری اول ہرا کنڈ آن مس۔ سی سی ٹی وی فوٹیجز دوئی کریسہ تدینی نا پٹ و پول بناء کننگانے۔
پولیس نا ردئٹ سم کاری نا سوب مُسہ کسری ہم ٹپی مسر ہرافتے ہسپتال آ دننگانے۔
تدینی آن گڈ علاقہ نا حالیت آک خراب خننگرہ۔ حوال رسینگنگ تون نوابزادہ لشکری رئیسانی ہم ہسپتال آ سر مس۔ پولیس نا پاننگ ءِ کہ اِرا اثر دار خاہوت آتا نیام ئٹ جنگ آن گڈ قبائلی جنگ ئنا خُلیس نا سوب ہمو جاگہ و ہسپتال ئٹ پولیس نا بھلو کچ اس سلفنگانے۔