بلوچستان ئٹ مذہبی انتہا پسندی نا بِج
ٹی بی پی سرگپ
پاکستان ئٹ حکومتی ادارہ غاک بلوچ راجی آجوئی نا جنز ءِ ایسر کننگ کن گمانی ڈول بلوچستان ئٹ شابیت جتا ڈول پالیسی ٹہفینو، ہرافتیٹ مذہبی انتہا پسند آتے بلوچ چاگڑد ئٹ سوگوْ کریسہ بلوچ جنز نا کسر ءِ توننگ نا کوشست اوار ءِ۔
بلوچ چاگڑد دیہاڑی بابت ئٹ سیکولر طب نا خواجہ ئسے ولے اِرا دہائی آن بلوچستان ئٹ مذہبی انتہا پسندی ءِ بھلو کچ ئسے آ تالان کننگ نا سوگوْ دروشم ئٹ کوشست آک برجاء ءُ۔ بلوچستان ٹی چرجوئی ئٹ دن انگا تدینیک پاش مننگ ءُ ہراڑان جتا مذہب آتا نیام ئٹ رواداری آ ٹہیفوک بلوچ چاگڑد ءِ مذہبی انتہا پسندی نا پارہ غا دھکہ تننگک۔
بلوچستان نا مکران ڈویژن دا وخت بلوچ انسرجنسی آن بھاز زیمی ءِ و بلوچ انسرجنسی نا مُخ تف تپہ و پروگریسو ادارہ تے چرجوئی ئٹ مذہبی انتہا پسند آک ٹک کننگ ءُ۔ پنجگور ئٹ چنا تا اسکول آک بھن تننگار، ساز و زیمل نا مجلس آک بند کرفنگار، گوادر ئٹ اوسس اسکول نا پرنسپل سر زاہد آسکانی نا خون کننگا، تربت نا بلوچ نوشتکار آتے خون ئنا تڑی تننگانے و برجاء دے تیٹ عطا شاد ڈگری کالج نا خوانندہ و بولان اسکول ئٹ استاد عبدالرؤف بلوچ ءِ مذہبی بے شرفی نا پِن آ حکومتی کڑدہ تا مخ تف مذہبی انتہا پسند آک کسفینو۔
بلوچ آجوئی نا جنز ئتون تفوک ادارہ و نیشنلسٹ پارٹیک چرجوئی ئٹ دوبہ خلنگ ءُ کہ پاکستانی لشکر نا سروکی ٹی بلوچستان ئٹ کشمیر جہاد تون تفوک جہادی تے بلوچستان ئٹ سوگوْ کریسہ ہندی کننگک تانکہ بلوچ چاگڑد ءِ مذہبی انتہا پسندی نا پارہ غا دھکہ تننگے و برجاء تربت تدینی ءِ نیشنلسٹ جماعت آک شاہ میر عزیز تون گنڈنگ ءُ ہراڑا مالو آن مذہب نا پِن آ خون ئنا دوبہ غاک خلنگانو۔
بلوچستان ئٹ راجی سیاست آ غیر اعلانیہ رکھ خلوک ءِ و پاکستان نا حکومتی ادارہ غاک مذہب نا پِن آ سیاست کروک آتے یلہ ہلانو۔ سیاسی ادارہ و جماعت آتے بلوچستان ئٹ مذہبی انتہا پسندی ءِ توننگ و مذہبی رواداری ءِ برجاء تخنگ کن گامگیج کروئی تمو، اگہ سیاسی تاغت آک بلوچستان ئٹ مذہبی انتہا پسند آتے توننگ ئٹ بے سہب مسر گڑا بلوچ چاگڑد ءِ بھلو نسخان اس مرو۔