کوئٹہ ئٹی بلوچستان یونیورسٹی نا براہوئی ڈیپارٹمنٹ ئٹ براہوئی بولی نا پنی آ نوشتکار ڈاکٹر تاج رئیسانی نا پوسکنا کتاب ”وئیروئی بینٹ“ ہرا کہ جہانی ادب نا افسانہ غاتا مٹ و بدل ئسے، اونا مون پاشی مجلس مس، دا مجلس ئٹ ادب دوست بندغ آتا بھلو کچ اس اوار مریسہ تینا خیال آتا درشانی کرے۔
کتاب نا مون پاشی مجلس ئٹ براہوئی ڈیپارٹمنٹ نا کماش ڈاکٹر منظور بلوچ تینا خیال آتا درشانی کریسہ پارے کہ براہوئی زبان ئٹ ڈاکٹر تاج رئیسانی نا عالمی افسانہ غاتا مٹ و بدل علمی چاہنداری نا گشاد ئٹ بھلو کاریم اس پاننگ مریک۔ ولے داڑتو اوار چندی سوج آتے ہم ودی کیک کہ لوز آتا ردئٹ اندنو کاریم اس ڈاکٹر کرینے ولے ویل دادے کہ او تینا دا علمی چاہنداری نا کاریم کن فکشن نا میدان ئٹ مٹ و بدل ءِ گچین کرینے، پاننگ کن تو دادے نن اسہ آزموندہ اس ہم پاننگ کینہ، ولے انت فکشن دن انگا تجربہ نا باریم ءِ ارفنگ کیک؟
او مونی پارے کہ ڈاکٹر تاج رئیسانی فکشن نا بندغ ئسے او دا لوز آتیکن فکشن نا میدان ءِ گچین کرینے اونا زبان بیدس ڈکشنری آن خواننگ مفک و فکشن یا ادب نا ویل دادے کہ تانکہ قاری اودے پوہ مف، او ہمو چس ءِ النگ کپک، ولے ڈاکٹر نا کاریم نا علمی خواست آن نمن مفک۔ ایلو پارہ غان ڈاکٹر براہوئی زبان ئٹ پٹ و پول کروک آتیکن دا کتاب نا ردئٹ اسہ بھلو چیلنج اس ہم مونا ایسونے، دا چیلنج، دا بھلا سوج اونا پارہ غان شعوری ہم مننگ کیک، و لاشعوری ہم۔ بروکا وخت ئٹی دا لوز آتیا مروکا پٹ و پول، دانا ارزشت، علمی حقانیت ءِ نہ بیرہ ثابت کرو، بلکہ دا گڑا نا دا کوشست ہم بروکا وخت ئنا علمی آ کاریم تون گنڈوک ءِ۔
دا مجلس ٹی بلوچی فلم ”لولان“ نا ٹولی ہم اوار ئس۔ او تینا خیال آتا درشانی کریسہ پاریر کہ اینو ننے دا خوشی مس کہ ننے بلوچ قوم نا ارٹمیکو بولی براہوئی بولی نا استاد، ادیب آتیتون اوار تولنگ و اوفتے بننگ نا شرف رسینگا۔ نن دا پاننگ خوانہ کہ ننا خواہشت ئسے کہ بلوچی نا فلم آک براہوئی بولی ٹی بدل کننگر اندن اگہ براہوئی فلم ارے تو اوفتے نن بلوچی بولی ٹی بدل کننگ نا ذمہ واری ءِ ارفنہ۔