جون فوسے ءِ اونا ڈرامہ و نثر کن 2023 نا ادب نوبل داد تننگانے، اونا نوشت آک بے توار آتا توار جوڑ مسنو۔
اینو نوبل کمیٹی ادب کن ہم نوبل داد 2023 نا پڑو کرے۔ دا شعبہ ئٹ ناروے نا پِنی آ نوشتکار جون فوسے ءِ نوبل داد تننگ نا فیصلہ کننگانے۔ فوسے ءِ اونا ڈرامہ و نثر کن دا شرف تننگا۔ نوبل داد نا کارن کلاسن جون فوسے ءِ 2023 نا ادب نوبل داد ءِ تننگ نا بابت سویڈش اکیڈمی ٹی نوبل کمیٹی نا سروک اینڈرس اولسن نا انٹرویو ءِ ہلک ہرا ٹی او پائک کہ ”فوسے نا نوشت آک نا کڑمب آ جوزہ آتے اسکان کارہ، یعنی فریشانی، بے رکھ، زند و مرک ئنا سوج آتے بش کیرہ۔“
جون فوسے اسہ ناروے نا ڈرامہ نگار و نوشتکار ئسے ہرا نارویجئن ادب و تھیٹر ئٹ تینا خذمت آتیکن چائنگک۔ او ستمبر 1959 ئٹ ناروے ٹی ودی مس۔ فوسے نا کاریمک بھازی تنیائی، خود شناسی و بندغی حالیت نا سرحال آتیا تالان ءُ۔ اودے اونا ادبی کاریم تیکن کیہی داد آک رسینگانو ہرافتیٹ نورڈک کونسل نا ادبی داد ہم اوار ءِ۔ فوسے ناروے نا اہم و پِنی آ نوشتکار آتیان اسٹ تکنگک۔
فوسے کیہی ڈرامہ و ناول تے نوشتہ کرینے ہرافتیان ڈرامہ (Someone is Going to Come) 1995 و “I Am Wind” اِرا ہزار دئے ئٹ شینک مس و اونا ناول ”میلانکولیا اولی“ 1995 ئٹ شینک مس، او تینا دا ناول ءِ چار بشخ ئٹ جتا سال تیٹ شینک کریسہ کرینے اندن اونا شاعری تا مجموعہ ”دی اسٹون چیئر“ 1996 ئٹ شینک مس۔ داکان بیدس او کیہی ڈرامہ و ناول تے نوشتہ کرینے۔ اونا کاریم تے کیہی بولی تیٹ مٹ کننگانے و او تینا خاص اسلوب و وجودی سرحال آتا سوب پِنی ءِ۔
یاتی مرے خدو یعنی 2022 کن ادب نا نوبل داد ءِ فرانسیسی زالبول نوشتکار اینی ارنو دوئی کریسس۔ او فرانسیسی نوشتکار و ادب نا پروفیسر ئسے۔ اونا ادبی کاریمک بھازی زند نوشت و چاگڑد آ تالان ءُ۔
نوبل داد 2023 کن جتا شعبہ آتیٹ داد آتا پڑو نا لڑ 2 اکتوبر آن بنا مسنے۔ اولیکو دے فزیولوجی نا شعبہ ئٹ کیٹالن کاریکو و ڈرو ویسمین ءِ نوبل داد تننگ نا پڑو مس۔ ارٹمیکو دے یعنی 3 اکتوبر آ شعبہ فزکس کن 2023 نا نوبل داد پیرے آگسٹنی، فیرینس کراؤسز و اینی ایل ہویلیر ءِ تننگا۔ مسٹمیکو دے، یعنی 4 اکتوبر آ کیمسٹری کن مونگی جی. باوینڈی، لوئس ای. بروس و الیکسی آئی. ایکیموو ءِ تننگا۔