افسانہ: او دیر اس
نوشت: درناز رحیم
دی بلوچستان پوسٹ
خلق ئنا رہی ئٹ اسہ اُشکُنو دگ ئس گدرینگاکہ، ہرا باز مُتکن و جاگہ جاگہ آن پنوک اس۔ دگ بھُٹ ئسے نا اسُل ماس آ اسک و کسر نا شیفینکو نیمغا منَہ اُرا و ڈغار تیٹ کشت و کشار اسر۔ ویگہ نا وخت اس۔ آہڑ نا مرغن و باسُن آ دیک ویگہ نا چار پنچ بجہ غان مُست پُدین متورہ۔ دے ئنا پُدینی آ ہرکس تینا ہڑدے نا کاریم تیٹ آختہ اس۔ فصل آ تیٹ نرینہ غاک کاریم کننگ اسر و منَہ چُنا گوازی کننگ اسر۔ بورنگ نا دیر تلاف ئٹ وہاکہ و تلاف آن جوک دیر ئے فصل آ تیٹ سر کریرہ۔ جو تا کرّک آ رخت آک قطار اسر و رخت آتیت چُک آتا کتوک۔ چُکاک بال کرِسا وختس چڑچڑ کریرہ تو قدرت نا ندارہ ئے ساز و باگل بشخارہ و دا ندارہ پین زیبدار مسکہ۔ نیل رنگ ئنا آسمان ئٹ جھمر نا پیہُن آ شینک آتیا خَن تماکہ تو قدرت نا زیبائی اُست ئے جارات نا جہان ئٹی سر کریکہ۔
خلق ئنا آبادی شش یا ہفت اُراغان زیات الو۔ اندا شش ہفت اُرا جتا جتا چار دیوالی کروک اسر۔ اسہ حاویلی دگ ئنا ماسا اسک و ایلو اُراک دگ آن مچٹ سِستہ اسر۔ دگ ئنا ماس ئنا حاویلی بھلن اس ولے مُسہ گیڈ تفوک اس ٹی تہ۔ نشخ تہ اندن اسک کہ ہر مُسہ گیڈ اسٹ ایلو تون گنڈوک اسر و دریچہ آک تا دگ ئنا پاسو آ اسر۔
گیڈ آتیان اسٹ ئٹی دریچہ نا رہا چُنک سن مسڑئس تولوک کشیدہ کننگ اس۔ او وار وار ئس دریچہ آن پیشن فصل آ تیٹ کاریم کروکا بزغر تے، گوازی کروکا چُنا تے و دگٹ ہنوک بروکاتے سئیل کریکہ۔ پیشن حاویلی ٹی اسہ زالبول ئس تار آ پُچ تالان کننگ و پیرو آئی سے تون ہیت کننگ ئٹی اسک۔ ہرا حاویلی نا رخت آتا سیخا ٹی پڑچھ ئس تالان کروک بَڑزی آ جھوکہ خلوک تولوک اس۔ آئی نا رہا اسہ لُونڈینگوکو چُناس گوازی کننگ اس۔ زالبول پُچ سلنگ کن بورنگ آ ہناسس ہراڑے خلک ئنا ایلو نیاڑیک پُچ سلنگ و دیر پُھر کننگ کن بسُرہ و داسا بورنگ آ مروکا اسہ اسہ ہیت ئنا حوال ئے آئی ئے تننگ اسک۔ آئی ہم خوڑت خفتورنگ ئٹی اس تہ۔۔۔
گیڈ ئٹی تولوکا مسڑکو کشیدہ کرِسا دریچہ آن پیشن ہُرا۔ دگ آ مون رنگ ئنا روب دارو گاڈی ئس مدا مدا برِسا بُھٹ ئنا چوٹ آ دگ ئنا کرک آ سلیس۔ مسڑکو کشیدہ ئے زان آن شیف کرِسا مُستی مس کہ ہُرِو دا امرو گاڈی سے، گاڈی آن دیر دھڑنگک۔ کس دھڑنگک یا گاڈی میتگ آ بریک، یا سما اف کسرے رد کرینے و دوارہ راہی مریک؟ دا خلک ئٹ تو دُنو گاڈی کس ئے اف گُڑا دا دیر نا ءِ، داڑے انتئے سلیس۔ مننگ کیک مہمان ئس مرے، ولے دیر نا مہمان مننگ کیک ؟ مُست آن دُنو گاڑی تو دا خلک ئٹی بتنے، یا سما اف گاڈی تا خراب مسک۔ اونا اُست ئٹی کیہی خیال بننگ اس، ولے گاڈی آن نہ کس دھڑنگا نہ گاڈی سُرا۔ جھٹ ئس جوانو گدرینگا، ولے گاڈی نا رہا ہچ سُر پُر متو۔ اندنی ٹی ایف سی نا گاڈی ئس اندا گاڈی آن زرس مونی گدرینگا سلیس۔ موننگا گاڈی سُرا، مدا مدا پدی برِسا دگ ئنا یام آ سلیس و گاڈی آن اِرا سِلہہ بندو بندغ دھڑنگار۔ تومکا تا دو ٹی توفک اسک۔ اوفک سادہ پُچ بینوک اسُر، و مونک تا مول اسر۔ ہڑتوما دگ ئنا یام آ سلیسر۔ ایف سی نا گاڈی آن ہم چار بندغ دھڑنگار و دَگ آ اندن سلیسُر پاروس کہ کس ئسے نا چاری ءُ۔
اندنی ٹی موٹر سئیکل ئسے نا توار مس۔ مسڑکو موٹر سئیکل نا توارے بِنگ و مونے ہمونگی ہڑسا۔ موٹر سئیکل آ ورناؤ مار ئس سوار اسک۔ موٹر سئیکل نا تومکا ہینڈل تیٹ پلاسٹک آ تیٹی گِڑا ٹنگوک اسر۔ گمان مسئکہ کہ ورنا شار آ ہناسس، شار آن سودا ہلکسس و اُراغا ہِننگ اس۔ شار ہم پانزدہ کلومیڑ آن زیات مُر الو، دا علاقہ آتا گیشتر بندغاک چُنکا چُنکا سودا تے خلک ئنا دکان تیان ہلکرہ ولے ایلو سودا تیکن شار آ ہنارہ بسرہ۔
اندن کہ مارکو کسر نا چوٹ ئے خُڑک کرے تونظر تہ مون رنگ ئنا گاڈی و ایف سی نا گاڈی آ تما۔ گاڈی تیا نظر تمنگ تون اوار مارکو موٹر سئیکل نا بریک ئے خلک و موٹر سئیکل ئے بِٹے، غٹ سوداک تمِسا دگ ئٹ ریڑ ہلکر، جند تہ مون شیف فصل آتا کُنڈ آ رمب کرے۔ مسڑکو ہپا مس کہ دا مارکو ئے انت مس دُن گنوکا تا وڑ موٹر سئیکل ئے بِٹے و نرنگ ءِ۔ مسڑکو نا ہِچ کاٹُم تمنگ الو۔ ہندُنی ٹی موننگا گاڈی آن دھڑنگوکا تومکا کارندہ آک سُم کاری بناء کریر و ایف سی نا کارندہ آک مارکو نا رند ئٹ رُمب کریر۔ مسڑکو نا خنک پھاؤڑینگار کہ دا انت ندارہ سے۔
سم تا توار تون فصل تیٹ کاریم کروکا بزغرک نرار، چُناک نرِسا دانگ اینگ مسر۔ مارکو نرِسا اس و رند ئٹ تہ ایف سی نا کارندہ غک رمب کننگ اسر۔ اینگان سادہ پُچ بینوکا بندغاک سُم کاری ئے توریر کہ داسا مونٹی ایف سی نا کارندہ غاک اسر، اگہ سُم خلکرہ تو کارندہ غاتے سُمک لگنگ کریرہ۔
اندا رُمب ئٹی ورنا نا اسہ نت ئنا چھوٹ پیشتما۔ اسہ نت ئٹی تہ چھوٹ ایلو نت شپاد رمب کننگ اس۔ اونا نرنگ نا وڑ آن اندا گمان مسکہ کہ زندہ سلامت دافتا دوٹی ہِچ تموئی الو تہ۔ ایف سی کارندہ آتیان اسٹ دانگان رمب کرِسا ورناغا سُم کاری بناء کرے۔ ولے مارکو اسُل سلینگ نا پِن ئے ہلتوکہ و اندن رمب کننگ اس پاروس کہ خواہنگ ءِ اگہ سُم لگیک تو پانے لگے تہ کہے یا گُڑا داکان تینے کشے، ولے دافتا دو ٹی تَمپ۔ رمب کرِسا اس کہ ایلو نت ئنا تہ چوٹ ہم پیشتما۔ داسا اسُل نت شپاد اس، بُوچ ءَ جھِر، پِت ءَ خل تا پرواہ ئے کننگ الو۔ دیچا اخس پِت اونا نتیٹ لگار۔ اندُنی ٹی سُم ئس دو ٹی تہ لگا۔ سُم لگنگ تون مارکو مچِہ جُگ ہلکک ولے سلتو۔ سم سُروش ناتہ بڑز آ لگاسس و دتک جو آن بار دو ئٹ تہ شیف وہنگ اسر۔
مسڑکو بش مس و رُمبِسا گیڈ آن پیشتما۔ اونا پیشتمنگ تون پین اِرا سم ئنا توار مس۔ حویلی ٹی آئی تینا ملخڑ تون ہبکہ سلوک اس۔ لونڈینگوکا چُنا آئی نا کچھ آ اسک و ہوغنگ اس۔ مسڑکو نا اُست ئنا درکہ آک اندن تیز اسر کہ گمان مسکہ داسا ایسا اُست تہ باٹی تہ بریک، پھاؤڑینگوکا خن تتون آئی ئے ہُننگ اس تو وار ئس تینا لمّہ ئے۔ زور ئٹ دم ئے راست کرسا پارے “گاڈی والاک مارکو ئے سم ئس خلکر آئی۔” آئی اسہ وار تو چنا ئے پڑچھ آ تخا و ہبکہ ہبکہ مُستی مرِسا سوج کرے “ اَرا مارکو ئے، دیر اسُر گاڑی والاک، دا ہمو سم تا توار اس؟ ”کس پارو مسڑکو نا گُٹ بارِس،“ دیچا آئی، سما اف دیر اس، اِرا گاڈی اسر، اسٹ ئٹی فوجی اسر، ایلو ٹی سما اف امرو بندغ اسُر، فوجی تو خننگتورہ۔” آئی ہم داسا الَو آن زیات فریشان مس و دو تے زان تیٹ خلسا پڑچھ آ تُوس۔
آئی پڑچھ آ تولنگ تون تینا تزبیع ئے ہرفے و ورد کرِسا دو تے کاٹم ئٹ خلک۔ چُنا اسہ وڑ ہوغنگ اس، شر خاتون چنا ئے بڈ کرے و بان ئٹی ہانئے توننگ اس، ولے مسڑکو ہموڑے تینا جاگہ غا سلوک اس و مارکو نا رمب کننگ، اونا نت تیان پازوار آتا پیشتمنگ، اونا دو آ سم ئنا لگنگ، و دتر تا وہنگ نا ندارہ اونا خن تا مون آن گدرینگ اسک۔ جھٹ ئس انداڑے گدرینگا، او گیڈ ئٹی ہِننگا ہم خُلینگ اس۔ ذہن ئٹ تہ سوج آک کاٹم ہرفنگ اسر، “ دیچا مارکو ئے ہلکر یا او بچا؟ سما اف امر مس؟ کاو دریچہ غان موٹر گاڈی تِہ ہُریو؟ پد ئنا ہڑتوما سُمک۔۔۔۔ ” ذہن ئٹ وار وار کاٹم ارفوکا دا گڈیکو سوال کھپی اسک، اونا پوروی آن مُست او مون کرے بان ئنا کنڈا، بان ئٹی پیہِسا مدا مدا دریچہ نا رہا بسک و انداڑے توس، و دریچہ آن کوکڑو کرے۔” او بیرہ موننگا اُلاخ ئے خنا ہرا دگ ئنا چوٹ آن چرینگِسا ہیمون مس، پدا مسڑ کو اودے خنتو۔
او مون ئے ہڑسا و جھوکہ خلسا اُست ئٹی پارے “ مارکو ئے ہلکر یا او بچا؟ دن زو او ارانگ نرو تینے بچفو ؟ ہلکر تہ چاوہ کہ، یا پد ئنا ہڑتوما سُمک لگار تہ ؟ دیچا کھسک یا زندہ مرو؟ جون ئے تہ دریر یا انداڑے تموک مرو، پیشن کاو ہُریو؟ کاو یا ہنپر؟ “ سوالک ہار ئنا دیر آن بار اودے پلویڑ کننگ اسر۔ او تینا غُٹ خیال آتا باریم ئے کاٹمان چھنڈیسہ بش مس و بھلو بھلو گھام ہرفِسا گیڈ آن حاویلی و حاویلی آن پیشن پیشتما۔ پد ئٹ آئی اودے توار کننگ اس “اَرانگ کاسہ، پیشن ہنپہ او گنوک امر اللہ گنوک کرے نے۔” ولے او ہچ بنتو۔
ڈن آ دانگ چَک خلک ھُرا، اینگ چک خلک ھُرا، بزغرک و ایلو بندغاک ہم الور، ہرکس ئے تینا ساہ ئنا ہلکسس۔ پیشن آ کس الو، ہمو مارکو ہم الو۔ او دگ ئنا کنڈا ہُرا موٹر سئیکل تموک اس، سوداک تموک اسر، اونا چھوٹاک ہم تموک اسر۔ مسڑکو منَہ گھام مُستی ہنا و تموکا چھوٹ ئے ہرفے۔ ایلو چھوٹ منَہ گھام مُستی تموک اس، او مَدا مَدا ہنا ایلو چھوٹ ئے ہم ہرفے۔ تومکا چھوٹ آتے دو ٹی کرے و ہموڑے توس۔ تولوک تولوک پدی چک خلک و تموکا موٹر سئیکل ئے ہُرا، اونا زہن ئٹ بس اسہ ہیت ئس اسک، “ او مارکو دیر اس ؟”