بلوچ لبریشن آرمی نا ترجمان جیئند بلوچ بیان اس شینک کریسہ پارے کہ بی ایل اے نا خاص ونگ اسپیشل ٹیکٹیکل آپریشنز اسکواڈ (ایس ٹی او ایس) اسہ ڈھکوک کارروائی اسیٹ پاکستانی لشکر نا صوبیدار اسیتون اوار اِرا کارندہ ءِ دزگیر کرینے۔
ترجمان پارے کہ بی ایل اے نا سرمچار آک چار شمبے نا دے بولان نا علاقہ مارگٹ ئٹ بنجاہی کسر ءِ بند کریسہ بس ئٹ سفر کروک پاکستانی لشکر نا صوبیدار محمد خان و سپاہی عبدالرشید ءِ چاہنداری آن پد دزگیر کریر۔
جیئند بلوچ پارے کہ دا کارروائی بلوچ لبریشن آرمی نا اسپیشل ٹیکٹیکل آپریشنز اسکواڈ (ایس ٹی او ایس) بی ایل اے انٹیلی جنس ونگ نا تروکا ڈھکوک معلومداری تا پاننگ آ سر تس۔
او گیشتر پارے کہ سر و سوج نا وخت آ ہڑتوم آ کارندہ غاک منار کہ او کوزہ گیر پاکستانی لشکر نا کارندہ ءُ و چھٹی گدریفسہ پدا بننگ ئسر کہ اوفتے دزگیر کننگا۔
او پارے کہ دزگیر ئٹ صوبیدار محمد خان ولد فیض محمد ہند نظام آباد تونسہ شریف، ڈیرہ غازی خان سر و سوج نا وخت آ پارے کہ او 1981 ئٹ پاکستانی لشکر نا فرنٹیئر کور سبی اسکاؤٹس ئٹ اوار مسنے، 19 سال کوزہ گیر لشکر ئٹ مریسہ سبی، ہرنائی و خاران رائفلز 89 ونگ ماشکیل ئٹی صوبیدار نا دروشم ئٹ تعینات مسنے۔
او ودیک پارے کہ دزگیر مروک ارٹمیکو کارندہ عبدالرشید ولد میوہ فقیر ہند پغلہ تونسہ شریف، ڈیرہ غازی خان سر و سوج نا وخت آ منّا کہ او کوزہ گیر پاکستانی لشکر نا فرنٹیئر کور سبی اسکاؤٹس ئٹ بھرتی مسوسس۔ او منا کہ زرغون گیس فیلڈ آ کوزہ گیر لشکر نا ظفر پوسٹ، حبیب پوسٹ، ڈبل فور، توقیر پوسٹ آ تعینات مسنے۔
اونا پاننگ ئس کہ عبدالرشید پارے کہ او صوبیدار محمد خان تون اوار سکیورٹی کارندہ نا دروشم ئٹ ساڑی ئس کہ اودے دزگیر کننگا۔
ترجمان جیئند بلوچ ودیک پارے کہ بلوچ لبریشن آرمی دزگیر مروک کارندہ تیان گیشتر سر و سوج کریسہ اوفتے بلوچ راجی عدالت ئٹ درو، ہراڑے اوفتا بابت ایسری فیصلہ کننگو۔