امریکہ نا غلام آک کہ ہرافک تینا مزاحمت ئٹ دیہاڑ نوشتہ کریر
نوشت: ڈاکٹر مبارک علی | مٹ: برناز بلوچ
دی بلوچستان پوسٹ
امریکہ نا جاندومی ریاست آتیٹی افریقہ غان ہتوکا غلام آتا بھلو کچ اس آبات ئس، ہرافک سفید فام مالک آتا ڈغار تیٹ سخت خواری ئٹ کاریم کریرہ۔
ہراتم اوفتے غلام جوڑ کرسا ہتنگ مس گڑا اوفتا پجار ءِ مٹ کننگا۔ اوفتیا پوسکنو پن تخنگ مس۔ اوفتا مذہب ءِ مٹ کننگا و اوفتے مسیحی جوڑ کننگ مس و اوفتا خواری کشی ءِ مننگ متو بلکن اوڑان نمن کرسا اوفتے شیف خلکر و کم تر ثابت کریر۔
اوفتا باروٹ دا ہیت لس کننگا کہ دا بدرنگ، موْن، گند کروک، بے واک و نالائخ ءُ۔ دا حالیت ئٹ اوفتون ترندی ئٹ پیش بننگ درست ءِ۔
نیگروز آتا باروٹ دیہاڑ نا ارٹمیکو چمشانک ءِ نوشتہ کننگ ڈکھیا ئس، انتئیکہ اوفتا تینا ہچو نوشت اس الوکہ۔ دا کمبوتی ءِ پورو کننگ کن تاریخ دان آک مسکوہی غلام آتیان انٹرویو ہلیسہ اوفتا زند و کاریم تا باروٹ ئٹ سرسوج کریر، دا وڑ امریکی غلام آتا اسہ پوسکنو دیہاڑ اس جوڑ مس، ہراد پیہن دروشمی آ نسل پرستی و اوفتا رویہ ءِ نغدی وڑ ئٹ مونا ہیس۔
غلامی نا دا سرحال آ Paul D. Escott نا کتاب Slavery Remembered قابل ذکر ءِ۔
نوشتکار آک درشان کیرہ کہ غلامی نا ادارہ ءِ برجا تخنگ کن پیہن دروشمی مالک آک سزا و اذیت تننگ ءِ کاریم ئٹ ہیسر تاکہ غلام آتیٹی خُلیس مرے و اوفک ہچ وڑ ئنا مزاحمت کپس۔
سزا تیٹی لس خل خلنگ اسہ سزا اس ئس، ہراتم غلام آک ڈغار تیا کاریم کننگ مسرہ گڑا فورمین بھاز وخت بیدس سوب ئسے آن ہر اسٹ ءِ کوڑا خلککہ۔ کاریم ئٹ بے واکی درشان کروکا تیکن جتاؤ سزا ئسک۔ ہندنکہ لخ ئٹی آہن نا طوق بیرفنگاکہ۔ نت تے زمزیر آتیٹ تفنگاکہ۔ ترند سزا نا حالیت ئٹ چھٹ ئٹ تفیسہ درخت آتیا ٹنگنگ مسرہ۔ وختس اوفتا دُو تے خاخر ٹی ہشارہ و وختس اوفتا ٹپ آتیا بے چھٹنگاکہ۔ گمان دا ئسک کہ دا سزا تا خُلیس آن غلام آتے تینا دوٹی کننگ مرو، و اوفتیٹی ہمت مروف کہ اوفک خواجہ آتا پاروکا ہیت آتیان نمن کیر۔
کاریم کن تیوہ ہفتہ مسکہ و حق زر اکن ہچو دے اس گچین مروک متوکہ۔ نرینہ و نیاڑی تا خاص ءُ پوشاک مسرہ ہرا سال ئٹی بیرہ اِرا وار اوفتے تننگارہ۔ اوفتا ہنکین آک بیرک دروشمی آ بان آک مسرہ و کُننگ کن نیمہ گڑا تننگاکہ۔ اگہ اسہ غلام ئسینا برام مسکہ گڑا او خواجہ نا است خواہی دا مسکہ کہ او نیاڑی زیات آن زیات چنا ودی کے تاکہ بھلن مننگان پد اوفک ہم غلامی ٹی اوار مریر۔ چنکا چنکا تے صفائی نا کاریم تیٹی خلنگاکہ و پانزدہ سال مننگ تون اوفتیان تیوہ کاریمک ہلنگارہ۔
غلام آتے مسہ تپہ ٹی بشخ کننگاسس، ہمو غلام آک کہ ہرافک ڈغار تیٹی کاریم کریرہ اوفتا تیوہ وخت سہب آن شام اسکان ڈغار تیٹی گدرینگاکہ، ایلو کاریگر آک غلام ئسر ہرافتے ہنرمندی، فنی چاہنداری نا سوب زیات ڈکھیا مروئی تمتوکہ۔ مسٹمیکو اُرائی غلام آک ئسر۔ اُرا نا کاریم تے کننگ نا سوب آن سفید فام مالک آک اوفتا خیال ءِ تخارہ۔ اوفتے کُننگ نا آسراتی ہم ئس۔ کوچ مین ہراتم وردی ءِ بینسا گاڑی ءِ چلفیکہ گڑا اود تینے ایلو غلام آتیان بڑز ہلککہ۔
غلام آتیٹی وفاداری نا جوزہ ءِ برجا تخنگ کن چرچ ئٹ عبادت نا وخت پادری تینا ہیت آتیٹی بائبل نا حوالہ ءِ تریسہ دا پنت تسکہ کہ غلام آتے مالک آتا وفادار مننگ مرے و کاریم تیٹی بے واکی نا درشانی کننگ مف ولے دا پنت و تبلیغ نا پد ہم غلام آتا تہٹی مالک آتا ہڷ و تس نا برخلاف جوزہ غاک بش مسرہ ہرا مزاحمت نا دروشم ہم ہلکرہ۔
مزاحمت اسہ ڈول دا ہم ئس کہ غلام آک نرّارہ ولے زوت اوفک ہلنگارہ۔
نرّوکا غلام آتے توننگ کن ہر کنڈ آ سفید فام گارڈ آتا چوکیک ئسر۔ ہلنگ آن پد نرّوکا غلام آتے سخت سزا تننگاکہ۔ گڑاس غلام آک نرّارہ و کھیب نا جنگل ئٹ تینے ڈھکارہ و اوفتا سنگتاک اوفتے کُننگ نا گڑا دریرہ سر کریرہ۔ مزاحمت نا اسہ ڈول داہم ئس کہ ناجوڑ مرین و تینا بشخ نا کاریم ءِ پورو کپن۔
سفید فام مالک آتا دا کوشست مسکہ کہ غلام آک اسہ جاگہ غا اوار تولپس تاکہ اوفتا نیامٹ ہچو سیوتی اس ودی مف، ہندا خاطران غلام آک ڈھکوک اوڑدہی مسرہ و تینا ڈکھ و دڑد آتے بیان کریرہ۔ مسخت دا ئس کہ اوفتا نیامٹ چاگڑد نا گمان ودی مرے و اسٹ مریسہ اوفک اسٹ ایلو نا ڈکھ و ویل آتیٹی اوار مریر۔ غلام آک دا ماحول ئٹ رہینگسہ ‘موْنا ربیدگ’ ءِ ہم ودی کریر ہرانا درشانی اوفتا ساز و زیمل و چھاپ آن مسکہ۔
او ساز و زیملی ازباب و دھول جوڑ کریر ہرانا سُر آ اوفک چھاپ کریرہ و شئیر خلکرہ۔ موْنا ربیدگ اوفتے اسہ جتاؤ پجار اس تس۔ امریکہ ئٹ لنکن نا کماشی ٹی سول وار بناء مس تو فیڈریشن نا مسخت دا ئس کہ ساؤتھ ءِ جتا مننگ اِلنگ مروف و یونین ءِ برجا تخنگ کن غلامی ءِ ایسر کننگ مرے تاکہ جاندومی ریاست آک نزور مریر۔
دا جنگ ئٹ غلام آک فیڈریشن نا فوج آتتون اوار مسر انتئیکہ دا غلامی نا ایسری کن جنگ کننگ ئسر، ہراتم جنگ ایسر مس و فیڈریشن نا فوج آک جاندوم ئٹ تینا حاکمیت ءِ مونا ہیسر گڑا غلام آتے اسہ پوسکنو آزموندہ اس رسینگا کہ فیڈریشن نا فوجیک ہم سفید فارم ئسر و اوفتیٹی ہم نیگروز آتا برخلاف تعصب ئس، دا وڑ خانہ جنگی غلام آتے آجو تو کرے ولے داڑتون اوار اوفتیکن کیہی ویل ہم ودی کرے ہرافتیٹی کلان بھلا ویل بیروزگاری ئس۔
غلام آتا گڑاس خاہوت آک روزگار نا پٹ و پول کن شمال نا ریاست آتیا ہمپیر ولے داڑے ہم اوفک تعصب نا گواچی مسر۔ ہرا غلام آک جاندوم ٹی پد رہینگاسر اوفک مسکوہی مالک آتا ڈغار تیٹی تنخواہ نا زی آ کاریم بنا کریر۔ جاندومی ریاست آتا باتیک غلام آتا آجوئی ءِ سگیتور۔
کو کلکس کلان (Ku klux klan) اسہ دہشتگرد جماعت اس ئسک ہرا نیگروز آتے بھیم نا گواچی کریکہ۔ داڑتون اوار جاندمی چاگڑد آک زنک پرستی نا بنیات آ نیگروز آتیان بائیکاٹ کریر، اوفتے سفید فام وانگجاہ تیٹی داخلہ تننگتوکہ۔ اوفتا عبادت جاہ جتا ئس، اوفتا پادریک ہم نیگروز مسرہ۔ ہوٹل آتیٹی اوفتے پیہنگ نا موکل الوکہ۔ بس آتیٹی اوفتیکن کن پد ئنا نشست آک مسرہ، سفید فام و نیگروز آتا نیامٹ برام کننگ آ رکھ ئس۔
دا تعصب و خار آتا نیامٹ بلیک کمیونٹی تینا حق آتیکن جہد و مزاحمت ءِ برجا تخا۔ داڑسکان کہ 1960 نا کرن ئٹ ہراتم کینیڈی امریکہ نا صدر جوڑ مس گڑا یکئی نا قانود آتے ایسر کرسا موْنا چاگڑد ءِ اونا حق آتے تس۔
داڑان بیدس کہ جمہوریت موْنا چاگڑد ءِ اونا سیاسی حق آتے تس ولے داسکان امریکہ نا چاگڑد آتیٹ نسلی تعصب برجا ءِ، واہم موْنا چاگڑد تینا دود و ربیدہ، ساز و زیمل، ادب و آرٹ ودی کرسا تینا پجار ءِ سوگوْ کرینے، و اوفتا دا سفر انگہ برجا ءِ۔ غلامی آن آجوئی اسکان اوفتا مزاحمت و جہد آن اوفتا آجوئی نا جوزہ آتا درشانی مریک۔