پاکستانی لشکر نا کارندہ تا دزگیری – بی ایل اے نا خاص کڑدہ انت ئسے؟
ٹی بی پی تیدری
نوشت: باہوٹ بلوچ
چار شمبے 11 اکتوبر آ پاکستان نا پیرا ملٹری فورس فرنٹیئر کور نا اِرا کارندہ صوبیدار محمد خان و سپاہی عبدالرشید ءِ سلہہ بند بندغ آک ہموتم دزگیر کریسہ نادرست ہند آ دریر ہراتم او بولان نا علاقہ مارگٹ آن تدینگ ئسر۔ ہڑتوم آ کارندہ غاک اسہ بس اسیٹ سفر کننگ ئسر کہ کسر آ سلہہ بند بندغ آک بس ءِ توریر و چاہنداری آن پد اوفتے تینتون اوار دریر۔
بلوچ لبریشن آرمی (بی ایل اے) ہڑتوم آ کارندہ تے دزگیر کننگ نا ذمہ واری ءِ ارفے۔ بی ایل اے نا ترجمان جیئند بلوچ اسہ شینک کروک بیان اسیٹ پارے کہ دا کارروائی ءِ بلوچ لبریشن آرمی نا اسپیشل ٹیکٹیکل آپریشنز اسکواڈ (ایس ٹی او ایس) بی ایل اے انٹیلیجنس ونگ نا فراوان کروک ڈھکوک معلومداری تا پاننگ آ سر تس۔
داکان مالو 14 ستمبر 2023 نا بیگہ کن کوئٹہ شار آن کم و ود 20 کلو میٹر نا مُری آ ولی تنگی نا ہند آ پاکستانی لشکر نا پوسکن ٹہفوک پوسٹ آتیا بلوچ لبریشن آرمی جلہو کریسہ اوفتیا کوزہ کریسس۔
ولی تنگی جلہو نا ویڈیو بی ایل اے نا میڈیا چینل ہکل آ ’چانڑدہ منٹ و چانڑدہ جنگجو‘ نا سرحال تون اوار شینک کننگا۔ ویڈیو نا بنا ئٹ پاش کننگا کہ بی ایل اے نا خاص کڑدہ ’فتح اسکواڈ‘ دا آپریشن ئٹ بشخ ہلکنے۔
بلوچ لبریشن آرمی نا جتا خاص کڑدہ غاک جوڑ کننگانو ہرافتا درشانی جتا حالیت آتیٹ بیان، ویڈیوز و عکس آتا وسیلہ ئٹ کننگانے۔
بی ایل اے – اسپیشل ٹیکٹیکل آپریشنز اسکواڈ (ایس ٹی او ایس) انت ئسے؟
بی ایل اے – اسپیشل ٹیکٹیکل آپریشنز اسکواڈ (ایس ٹی او ایس) نا بابت باقاعدہ بیان 21 اکتوبر 2018 آ ہمو وخت مونا بس ہراتم بی ایل اے نا اسہ جنگجو فتح قمبرانی عرف چیئرمین بولان نا علاقہ مچھ ئٹ پاکستانی لشکر تون اسہ جھڑپ اسیٹ شہید مس۔
بی ایل اے نا ترجمان جیئند بلوچ بیان ئٹ پارے کہ فتح قمبرانی بی ایل اے – اسپیشل ٹیکٹیکل آپریشنز اسکواڈ نا کماندار نا دروشم ئٹ کاریم کننگ ئس۔
گل ئنا شینک مروک لٹریچر ئٹ پاننگا کہ ’ایس ٹی او ایس یا اسپیشل ٹیکٹیکل آپریشنز اسکواڈ بلوچ لبریشن آرمی نا اعلیٰ تربیت ہلوک ہمو خاص کڑدہ ءِ ہرا شاری و مَشی آ علاقہ تیٹ بلوچ لبریشن آرمی نا خاص آپریشن آتے پیشہ ورانہ لائخی تون سر ایتک۔‘
بلوچ لبریشن آرمی نا کاروائی تیا تالان رسالہ ’دک‘ ئٹ بی ایل اے – ایس ٹی او ایس نا خاص ضمیمہ اوار کننگک، ہرا ٹی دا کڑدہ نا کاروائی و بیران مروک بندغ تا ہم ذکر کننگک، ہرا دا کڑدہ نا بشخ مریرہ۔
دک 2022 نا رپورٹ نا ردئٹ بی ایل اے – ایس ٹی او ایس خدو تیوہ غا بلوچستان ئٹ 9 کارروائی کرے ہرافتیٹ زیارت آن پاکستانی لشکر نا حاضر سروس کرنل لئیق بیگ مرزا ءِ دزگیر کننگ، ہرنائی آن پاکستانی لشکر و ڈھکوک ادارہ تا اِرا کارندہ ءِ دزگیر کننگ و دا نیام ئٹ آپریشن ئٹی اختہ اسہ ہیلی کاپٹر ئسے بھس کریسہ افسر آتیتون اوار شش کارندہ ءِ مرگ ئنا گواچی کننگ اوار ءِ۔
اندن خدو سال نا ایسر ئٹ 25 دسمبر آ بی ایل اے نا مسکوہی کماش جنرل اسلم بلوچ نا سال دے نا وخت آ پد مہ پد جلہو آتیٹ اِرا ترند حالیت نا جلہو تربت و کاہان ئٹ مسر ہرافتیٹ جمعی ڈول پاکستانی لشکر نا اسہ کیپٹن و کمیشنڈ افسر تون اوار 15 کارندہ مرگ ئنا گواچی مسر۔ پن کروک کارروائی تے ہم بی ایل اے نا ایس ٹی او ایس سر تس۔
داکان بیدس شار تیٹ دا کڑدہ سلہہ بند جلہو آتیان بیدس بمب تراک آتیٹ پاکستانی لشکر نا مُخ تف بندغ آتے ٹک کرینے۔ بلوچستان نا شار تیٹ اندا کڑدہ ’مقناطیسی بمب‘ ءِ درستی راستی کرفے۔
دا کڑدہ نا باسک آتیان طارق مری عرف ناصر بولان و ہرنائی نا مَشی آ لڑ ئٹ 23 اکتوبر 2021 آ جنترو نا ہند آ پاکستانی لشکر تون اسہ جھڑپ اسیٹ شہید مس۔ بی ایل اے نا بیان ئٹ پاننگا کہ طارق مری عرف ناصر ہند کاہان، بلوچ لبریشن آرمی بولان ریجن نا اسپیشل ٹیکٹیکل آپریشنز اسکواڈ نا کماندار ئس۔
دا کڑدہ نا شاری باسک تابش عنایت عرف ریحان ہند خدابادان پنجگور 29 جولائی 2021 نا نن پنجگور ئٹ پاکستانی لشکر تون اسہ سلہہ بند جھڑپ اسیٹ شہید مس۔
بلوچ لبریشن آرمی نا دا کڑدہ ءِ بی ایل اے نا کماش بشیر زیب بلوچ نا برجاء سال شینک مروک ویڈیو کلہو آتیٹ ہم خننگ مریک، ہراڑے دا کڑدہ نا باسک آک خاص وردی بینوک و پوسکن سلہہ ارفوک خننگرہ۔
بی ایل اے – فتح اسکواڈ انت ئسے؟
گل ئنا لٹریچر نا ردئٹ ’فتح اسکواڈ بلوچ لبریشن آرمی نا پنچمیکو کڑدہ و ”ہر اول دستہ“ ءِ۔ اکتوبر 2018 اسکان فتح اسکواڈ بی ایل اے نا چارمیکو کڑدہ ”ایس ٹی او ایس“ نا اسہ سوگوْ ءُ بشخ اس ئس۔ واہم 20 اکتوبر 2018 آ سرمچار فتح قمبرانی عرف چیئرمین نا شہید مننگ آن پد، بی ایل اے فتح قمبرانی نا دلیری نا سوب ”فتح اسکواڈ“ ءِ اونا پِن آ جوڑ کریسہ اسہ جتا ءُ کڑدہ ئسے نا حیثیت تس۔‘
گیشتر پاننگا کہ ’بلوچ لبریشن آرمی نا دا ”ایلیٹ ونگ“ پیشہ ورانہ لائخی تا خواجہ، آزموندہ کار آ سرمچار آتیا تالان ءِ، ہرا ہر اول دستہ نا کڑد سر تریسہ، دژمن نا کیہی کیمپ آتیا کوزہ کننگ ئٹ سرسہب مسنے۔‘
بی ایل اے 31 مئی 2021 آ بولان نا علاقہ مارواڑ ئٹ پاکستانی لشکر نا غازہ بند اسکاؤٹس 129 ونگ نا اویس کیمپ ءِ اسہ ترند حالیت نا جلہو اسیٹ ٹک کرے، پن کروک جلہو ئٹ پاکستانی لشکر نا 24 کارندہ مرگ ئنا گواچی مسر و اسٹ ئسے سرمچار آک دزگیر کریر۔
پن کروک جلہو ئٹ بی ایل اے نا 3 سرمچار ہم شہید مسر، ہرافتیٹ ہنگل مری عرف لیلا، آفتاب جتک عرف وشین و شاویز زہری عرف سارنگ اوار ءُ۔
بی ایل اے ترجمان پارے کہ ہر مُسہ بندغ بلوچ لبریشن آرمی نا ہر اول دستہ نا باسک ئسر۔ ترجمان گیشتر پارے کہ فتح اسکواڈ ئٹ گل ئنا ہمو گچین کروک دلیر آ سرمچار آک اوار ءُ، ہرا قدرتی جنگی لائخی تا خواجہ مننگ تون اوار دا خاص تربیت ءِ ہم دوئی کرینو کہ او مون پہ مون مونتس آتیٹ سرمچار آتا راہشونی ءِ کیر و دژمن نا چر آتے پرغیسہ تہٹی پیہر۔
فتح اسکواڈ نا بابت شینک مروک کتابچہ ئٹ اسکواڈ نا 17 ٹِک آتیا تالان راہبند نوشتہ ءِ، پن کروک ٹک آتیٹ دا ٹک آک ہم اوار ءُ کہ اسکواڈ نا باسک آک اوار مننگ آن پد تینا وس ئٹ مفرور، و غٹ فیصلہ آتیٹ بنجاہ نا پابند مرور، نرّنگ، سلہہ بِٹنگ یا گل ءِ الینگ نا دروشم ئٹ پن کروک باسک کسفنگو۔ اسکواڈ حال احوال کن ٹیکنالوجی نا کارمرز خاص حالیت آتیان پیشن کپرو۔ اسکواڈ نا سنگت آتا شہید مننگ نا دروشم ئٹ، پِن پاش کننگ مشن نا ردئٹ گل ئنا ذمہ واری مرو۔ اسکواڈ نا باسک آک تینا رینک ءِ اسہ دروشم اسیٹ ہم پاش کپرور۔
ایسری
بلوچ لبریشن آرمی نا کاروائی تیٹ بدلی خننگ ئٹ بریک۔ تدوکا پنچ سال ئنا نیام ئٹ بی ایل اے – مجید بریگیڈ ہراڑے تینا جلہو آتیٹ ترندی ایسنے، ہموڑے گل مَش و شار تیٹ جتا حالیت نا کارروائی سر تسنے ہرافتیٹ وڑ و ڈول ئٹ بدلی خننگ ئٹ بسنے۔
بی ایل اے نا انٹیلیجنس ونگ تربت ئٹ پاکستانی لشکر نا ڈھکوک ادارہ تا بڑزکو افسر آتا معلومداری تے مُچ کننگ تون اوار گوادر نا حساس علاقہ تیٹ چینی کمپنی نا کارندہ تا ہن و بر نا معلومداری تے ہم مُچ کننگ ئٹ سرسہب خننگا اندن ولی تنگی، مارواڑ، کاہان و ایلو ہند آتیا پاکستانی لشکر نا کیمپ آتیا کوزہ کننگ ئٹ سرسہبی و بنجاہی کسر تے بند کریسہ فوجی افسر و کارندہ تے دزگیر کننگ بلوچ لبریشن آرمی نا کڑدہ آتا سوگوْی ءِ پاش کیک۔
ترند حالیت نا جلہو تا ردعمل ئٹ پاکستانی لشکر نا پارہ غان مالو آن دزگیر (زوراکی ئٹ بیگواہ) مروک بندغ آتے کسفنگ فوج ئنا بے سہبی ءِ پاش کیک اندن بروک وخت ئٹ دا کڑدہ تا گیشتر سوگوْی نا پک گمان ارے۔
بی ایل اے نا کماش بشیر زیب بلوچ تینا کلہو ئٹ پارینے کہ ’ننے تینا جنگ ءِ داڑے اسکان ہتوئی ءِ کہ اسلام آباد، پنڈی، لاہور و گجرانوالہ نا بندغ آک پیشن پیشتمر، پریاد کیر و پاکستان ءِ پار کہ داسہ بس کہ، بلوچستان ئٹ جنگ ءِ ایسر کہ۔‘