بلوچستان نا ضلع کیچ ئنا بنجاہی شار تربت آن استو پاکستانی لشکر چار ورنا ءِ زوراکی ئٹ بیگواہ کرینے۔
شابیتی حوال تا ردئٹ پاکستانی لشکر و ڈھکوک ادارہ تا کارندہ غاک چھاپہ خلیسہ استو تربت آبسر آن ایوب نا مار سرفراز ءِ دکان آن دزگیر کریسہ بیگواہ کریر۔
خیال ئٹ مرے پن کروک ورنا ہفت توہ مالو ہم بیگواہ کننگاسس و اودے یلہ کننگ آن پد دوارہ دزگیر کریسہ بیگواہ کننگانے۔
استو یک بجہ غا تربت نا علاقہ سنگانی آن پاکستانی لشکر اسہ ورنا ئسے دزگیر کریسہ نادرست ہند آ درے۔ پن کروک ورنا نا چاہنداری محمد خالد نا مار بالاچ نا پن ئٹ مسنے۔
اندن تربت نا علاقہ آبسر آن پاکستانی لشکر نواب بلوچ ءِ زوراکی ئٹ بیگواہ کرینے۔
علاقائی احوالکار تا ردئٹ استو آبسر تربت آن نواب بلوچ تون اوار کیہی ورنا تے زوراکی ئٹ بیگواہ کننگانے۔
خاہوت نا پاننگ ءِ کہ نواب بلوچ اسہ خوانندہ ورنا اسیتون اوار تینا اُرا و خاہوت نا ذمہ وار ءِ و اونا برام نا تیاریک برجاء ءُ۔
ایلو پارہ غان تربت نا علاقہ آبسر آن استو پاکستانی لشکر یوسف بلوچ پِنی ءُ ورنا ئسے ہم دزگیر کریسہ نادرست ہند آ درینے۔
بی این ایم نا بندغی حق آتا کڑدہ پانک ئنا رد ئٹ پن کروک ورنا ءِ پاکستانی لشکر اسہ وار مالو ہم زوراکی ئٹ بیگواہی نا گواچی کرینے۔
یاتی مرے زوراکی نا بیگواہی تا تدینی تیٹ ہموتم ترندی بس ہراتم درو نگران وزیر اعلی بلوچستان تربت نا دورہ غا بسوسس۔