دی بلوچستان پوسٹ نا ڈیٹا ویژول اسٹوڈیو نا کچ و حساب ئنا ردئٹ سال 2023 ئٹ پاکستانی لشکر بلوچستان نا کم و ود 51 علاقہ تیٹ کارروائی کرے۔ ٹی بی پی اندا چھاپہ، آپریشن و کسر تے بند کننگ نا شابیتی احوال تے فراوان کننگ ءِ۔
سال 2023 بلوچستان نا فوجی ندارہ نا اسہ پین ونڈ اس ئس، ہراٹی غنجل ودکی و فوجی کاروائیک اوار ءُ۔ دی بلوچستان پوسٹ نا ڈیٹا ویژول اسٹوڈیو نا پارہ غان دا جمعی رپورٹ بلوچستان ئٹ پاکستان نا سلہہ بند کاریم تا خوڑتی ئٹ جاچ ءِ ہلیک، ہرا زیمی مروک ضلع تیٹ آپریشنز آتا اسہ جمعی سالانہ جاچ اس فراوان کیک۔ بلوچستان نا ڈیہہ ئنا سیاسی اہمیت نا سوب غنجل سُر پُر آتے پہہ مننگ بھاز الّمی ءِ۔
علاقائی جاچ:
دا رپورٹ بلوچستان ئٹ پاکستانی لشکر نا کاریم تا اسہ جمعی سالانہ رسینگوک رپورٹس آتیا تالان و سال 2023 ئٹ بلوچستان نا 51 زیمی مروک ضلع تیٹ فوجی کارروائی تا بابت شابیتی احوال فراوان کیک۔ ہرافتیٹ کوئٹہ، گوادر، تربت، و خضدار کون آ بھلا شار، وڈھ و قلات کون آ چنکا شار و داڑ اسکان کہ مارگٹ کون آ مُر ئنا مَشی علاقہ تیٹ فوجی کاروائیک اوار ءُ۔
خدو تربت، خضدار، پنجگور، بولان، قلات، کوئٹہ، گوادر، مستونگ، ڈیرہ بگٹی و وڈھ تیوہ غاتیان زیات زیمی مروک علاقہ تا دروشم ئٹ مونا بسر۔ تربت 112 پاکستانی لشکر نا کارروائی تا رپورٹ مروک تدینی تیتون اوار دا لڑ ئٹ اوار ءِ، اوکان پد خضدار 70 و پنجگور 64 تدینی تیتون اوار دا شابیت ئٹ اوار ءِ، ایلو زیمی مروک علاقہ تیٹ سبی، مچھ، مند، آواران، کوہلو، تمپ و ایلو علاقہ غاک اوار ءُ۔
جمعی کچ:
دی بلوچستان پوسٹ رپورٹ نا دا بشخ ئٹ 919 سلہہ بند کارروائی تا شابیتی احوال فراوان کننگو، ہراڑے جتا علاقہ تیٹ 292 کسر بند و شاری تے بھیم نا گواچی کننگ تون اوار اوار بے قانودی ڈول ئٹ 424 سرچ آپریشن و چھاپہ غاک بے قانودی دروشم ئٹ کاریم ئٹ ہتنگار اندن 2023 ئٹ 202 فوجی آپریشن کننگا۔
توئی سلہہ بند کاروائیک:
دی بلوچستان پوسٹ نا ڈیٹا ویژول اسٹوڈیو رپورٹ نا مسٹمیکو بشخ توئی سلہہ بند کارروائی تے پاش کیک ہرا وخت ئتون اوار ترند مریسہ کریر۔
سال 2023 نا بنائی توہ جنوری ٹی 44 فوجی کارروائی تا تدینیک مسر، ہرافتیٹ 21 چھاپہ، 11 فوجی آپریشن، و 12 ناکہ بندی اوار ئسر، فروری ٹی دا کچ 50 تدینی تیتون اوار ودیسہ ہنا، و اگست اسکان 148 اسکان سر مس۔
ایسری:
ایسر ئٹ دا رپورٹ 2023 نا وخت ئٹ بلوچستان ئٹ فوجی ندارہ نا اسہ جمعی جاچ اس ایتو ہرا پاش کیک کہ بلوچستان ئٹ برجاء سلہہ بند کارروائیک ہرافتیتون بلوچستان نا بندغ آک مون تننگو، فوجی کارروائی و بے ایمنی نا سوب جوڑ مننگو و بلوچستان ئٹ برجاء سیاسی شورش ءِ ہم ودفنگ ءُ۔
دا ڈیٹا دی بلوچستان پوسٹ ڈیسک و کیہی احوالکار آتیان رسینگوک رپورٹ آتیا تالان ءِ داکان بیدس درستی ءِ یخینی جوڑ کننگ نا کوشست مسنے، خوانوک آتیان خواست ءِ کہ او رسینگوک معلومداری تیٹ مننگ کروک حد و حالیت آتا برجاء دیمروی نا سوب آن نغدکاری فیصلہ غا عمل کیر۔