بلوچ راج برانزی جنز نا بشخ مریسہ بلوچ لمہ غاتون اوار بندی و شہید آتا وارثی ءِ کرے – ڈاکٹر ماہ رنگ بلوچ

بلوچ راہشون ڈاکٹر ماہ رنگ بلوچ پارینے کہ ننا جنز ئنا 53 دے بلوچ راج ننتون تفوک مس۔ اُرا تیان پیشتمنگ اڑزان الو، بلوچ آک تینا ساہ ئنا سودا ءِ خلسہ نئے بیرہ دا لمہ بلکن بندی و شہید آتا وارثی ءِ کریر ارافک بلوچ راج ئکن تینا کاٹم تے ندر کریر۔

او پارے کہ بلوچ یکجہتی کمیٹی نا دا جنز بلوچ زنک ایسری نا برخلاف سوگو ءُ جنز ئسے۔

او پارے کہ خلیس ریاست نا مشینری سے، نن خلیس نا گواچی مرسہ تینا بندغ آتا جون تے ارفسہ کرین۔

او پارے کہ ننا راجی طاغت دا ریاست نا فوجی طاغت آن بھلو طاغت ئسے۔ ہرا وڑ اوفک ننے ننا ڈغار گوادر،اورماڑہ یا ایلو جاگہ غاتا بدر جوڑ کریر۔ روزگار پلنگا، بلوچ ءِ اسہ وخت نا ارغ آن محتاج کرینو۔

او پارے کہ ہرا وڑ بلوچ اُلس مکران، جھالاوان، ساراوان، کوہلو، کراچی،لسبیلہ غان پیشن پیشتمار ننتون اوار مسر نن اوفتا منتوار ان۔

او مستی پارے کہ پھگہ بلوچ زنک ایسری نا برخلاف جنز ئنا 54 میکو دے ننا جنز ئنا مسٹمیکو لڑ آن گڈ گڈانی، گوادر، پسنی، دشت، کیچ، منگوچر و بانک نا تمپ ئٹ برانز مچی کشنگو۔ کنا نمے آن بزگی آ خواست ءِ کہ بلوچ زنک ایسری نا برخلاف توار ارفبو کہ دا برانز آتیٹی اوار مبو۔ دا راج ئسے نا وڑ ننکن گمری ءُ وخت ئسے کہ زالبول آک دا جنز ئنا راہشونی ءِ کننگو۔

او پارے کہ دا جنز ءِ پک کننگ و دانا خواجہ مننگ کن دلیر آ زالبول تے بروکا برانز آتیٹی اوار مننگ و اونا راہشونی ءِ کننگ کن ایتر، اراڑے زالبولک بشخ ہلتنو، اوفک نئے بشخ ہلیر بلکن بلوچ زنک ایسری نا برخلاف جنز ءِ سرسہب کننگ کن دا جنز ئنا راہشونی ءِ کیر و ریاستی مشینری ءِ پاش کلہو ایتر کہ بلوچ ننا زنک ایسری نا برخلاف اسہ راج ئسے نا وڑ سلوک ءِ۔