کرگز
نوشت: فرانز کافکا
مٹ: انیس بلوچ
دی بلوچستان پوسٹ
اسہ کرگز اس کنا نت تے دتری کننگ ئس۔ دا مالوان کنا بوٹ آتے ہراسس و جُراب آتے بروفتہ کریسُس داسہ تو کنا نت تے ٹومبنگ ئس۔ دا وار وار آ اوفتے سُنٹ خلنگ ئس و ولدا بے جاراتی اٹ کنا داپار ایپار آن پھیری کرسا تینا کاریم ءِ برجاء تخاسس۔
شرفدار ءُ اسہ بندغ اس اوکان ہنسا زرس اُرا و کنے آن ہَرفے کہ کنے کرگز انتئے تکلیف تننگ ءِ۔ ای پاریٹ، ”ای بیوس اُٹ ہراتم کہ دا بس و کنے آ جلہو کرے تو یخین ئٹ ای دادے مُر کننگ نا کوشست کریٹ ہنداخس کہ گٹو کریٹ تہ ولے دا ساہدار آک بھاز سوگو ءُ دا زرہ سے اٹ کنا مون آ جلہو کریسوس ولے ای تینا نت تے قربان کننگ ءِ اہمیت تسوٹ۔ داسہ تو دافک بور بور مسنو۔“
”چاوا کہ مزہ بننگ ءِ نے دا وڑ دانا ظلم ءِ سگنگ اُس۔“ شرفدار آ بندغ پائے۔ ”اسہ سُم اس و دا کرگز دو تل۔“
”انت پاسہ جائی“ ای پاریٹ۔ ”گڑا نی اندا کاریم ءِ کروس؟“
”خوشی اٹ۔“ شرفدار آ بندغ پارے۔ ”کنے توفک ءِ ارفنگ کن بیرہ اُرا اسکا انوئی مرو۔ مگہ نی نیم گھنٹہ اس انتظار کروس؟“
”ای پک پاننگ کپرہ۔“ ای پاریٹ، و دڑد آن سخت انگا پاٹ آنبار جِک سلیسوٹ۔ ولدا ای پاریٹ کہ ”ہمت اٹ وڑ نہ وڑ اس کیس۔“
”بھاز جوان ای زوت بننگ نا کوشست کروٹ۔“ او پارے۔ دا ایت و گپ آتے کرگز چُپی اٹ بِننگ ئس او کنے و شرفدار آ بندغ ءِ واری واری آ اُریسہ ئس۔ داسہ کنے احساس مننگ ئس کہ دا ہر ہیت ءِ جوانیکا سرپد مسونے۔ دا پرہ غاتے تینا تالان کرے، مچے پدا مس ٹیٹ مننگ کن و ولدا نیزہ خسوکا تیانبار تینا سنٹ ءِ کنا باٹی شاغا و بھاز زیات تہٹی درے تہ ہراتم کہ دا تینا کاٹم ءِ کشا و اودے تینا دتر تیٹ ٹُبنگ آ خننگ آن کنا است ءِ جارات رسینگا ارا کہ ہر کڑمبی ءِ پُر کننگ ئس ہر ساحل آ سیلاب بننگ ئس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔