آواران ٹاؤن ئٹ بجلی نا ہن و بر برجاء، ارٹمیکو پارہ غان مخلوق نا ویل آتیان بے سماء سیاسی ٹولی تا جلسہ غاک ترندی ئٹ مننگ ءُ ہرافتیٹ او مخلوق کن انقلابی گامگیج کننگ نا بھلو تُغ نشان تننگ ءُ۔
دا وخت آ کڑدہ غاتا و چاگڑدی باسک سمعیہ عبداللہ نا پارہ غان پاننگا کہ آواران ئٹ تدوکا اِرا ہفتہ غان بجلی نا ہن و بر برجاء ءِ۔ وخت وخت اِرا، اِرا دے بجلی اودیم مریک تو وختس ہفتہ ٹی بیرہ اِرا دے بجلی بریک۔ غریب آ مخلوق اِرغ و دیر ئنا آہری ءُ۔
او پاریر کہ آواران ئٹ سال آتیان اقتدار ئٹ تولوک میر عبدالقدوس بزنجو نا نامزد ایلم میر عبدالوہاب بزنجو تینا شینک کروک ویڈیو کلہو ئٹ پائک کہ آواران بنداوی آسراتی تیان پدماندہ ءِ۔ نن اوڑان ہرفنگ خوائنہ کہ تدوکا چِل سال آن نما خاہوت اقتدار نا چس ءِ ہلنگ ءِ گڑا صاف صاف انتئے پاپیرے کہ آواران نا بھس کاری نا ذمہ وار عبدالقدوس بزنجو ءِ۔
گچین کاری تا خڑک بننگ تون غٹ سیاسی ٹولیک تینا ووٹ آتا خاطر جلسہ تیٹ اختہ ءُ اندن بجلی نا مفننگ آن تاجر آتا خواری تیتون مون تننگ ءُ۔