بلوچ راہشون و بساک نا مسکوہی سَروک ڈاکٹر صبحیہ بلوچ چاگڑدی حوالکاری ویب سائٹ “ایکس” آ پوسٹ ئس کرسہ پارینے کہ دا جنز ءِ اسلام آباد آن ہچو امیت ئس الو۔
او پارے کہ داسا نا اُمیتی نا ہچو ہیت ئس اف،ننے تینا ویل ءِ جہان ءِ سر کروئی ئس و نن سر کرین تہ۔
او مستی پارے کہ دا وخت آ بیرہ تولوک برانز ایسر مسنے و بلوچ زنک ایسری نا برخلاف دا جُنز پین ترند مرو۔
او گیشتر پارے کہ بلوچ آتا توار بلوچ تینٹ ءِ و ببو نن تینٹ دا جہد ءِ سوگو کین۔
یاتی مرے کہ تربت تدینی آن گڈ بلوچ زنک ایسری نا برخلاف بناء مروکا جُنز تینا خواست آتا پورواری کن تربت آن مارچ کرسہ پاکستان نا بنجاہی شار اسلام آباد ءِ سر مس و بلوچ برانزیک امیڑے کیمپ ئس ٹہیفسہ تولوک برانز کریر۔
ولے بلوچ برانز تا پاننگ ءِ کہ ریاستی کارندہ غاک اوفتا خواست آتے پورو کننگ نا جاہ اوفتے وڑ وڑٹ بھیم تننگ نا کوشست کریر و اوفتے انصاف تننگ نا جاہ دہشت گرد پاریر۔
ہندن دا جنز ئنا راہشونی ءِ کروکا بلوچ راہشون ڈاکٹر ماہ رنگ و سمی دین درو پریس کانفرینس کرسہ پاریر کہ نن اسلام آباد آن تینا تولوک برانز نا ایسری نا پڑو ءِ کینہ۔
او مستی پاریر کہ نن تینا تولوک برانز کیمپ ءِ ایسر کننگ نا پڑو کینہ و پدی بلوچستان آ ہنسہ بلوچستان نا بھلا مش تیان ہلیس خرن آ دریا اسکان اسلام آباد ئٹ تینتون مروکا کسہ غاتے تینا مخلوق ءِ پارون۔
او گیشتر پاریر کہ دا جنز ءِ برجاء تخنگ نا رد ئٹ 27 جنوری آ شال ئٹ جلسہ ئس کرون۔