ضلع کیچ ئنا سب تحصیل ہوشاپ آن پنجاب نا ہندی پنچ بندغ برمتہ کننگار۔
سرکاری حوال آتا رد ئٹ اینو دیگر آ ضلع کیچ ئنا تحصیل ہوشاپ نا کیب ئنا خلق ڈنڈار آن سلہہ بند بندغ آک صوبہ پنجاب آن تعلقداری تخوکا پنچ بندغ ءِ ہمو وخت آ برمتہ کریسہ نا درست ءُ ہند ئسے آ دریر ہراتم اوفک سرکاری ٹیلی کام کمپنی یوفون نا اسہ پوسکنو ٹاور ئسے نا جوڑ کننگ کن ہموڑے کاریم کننگ ئسر۔
حوال آتا رد ئٹ لیویز کیچ تدینی ءِ پک کرے و پارے کہ برمتہ نا دا تدینی بلوچستان نا جنگ آن زیات زیمی مروکا ضلع آواران نا خڑک آ ود و کم 7 کلومیٹر ضلع کیچ ئنا تہٹی مس۔ اوفتا رد ئٹ او بندغ آک اسہ کرولا گاڈی اسیٹی او علاقہ غا کاریم کن ہناسر۔
برمتہ کروکا تیٹی نزیر احمد، محمد طارق، صفدر علی، فاروق و حسنین اوار ءُ۔
بست و بند نا رد ئٹ اسسٹنٹ کمشنر تربت ڈپٹی کمشنر کیچ ئنا پرمان آ لیویز نا اسہ ٹیم ئس پن کروک علاقہ نا پارہ غا رادہ کرینے۔ واہم دائسکان برمتہ مروک آتا باروئٹ معلومداری دوئی مننگ کتنے۔