ودار نا امیت
بیگواہ غا ایلم سیف اللہ رودینی نا پن آ
نوشت: فرزانہ رودینی | مٹ: امتیاز بلوچ
دی بلوچستان پوسٹ
مُد آتا رنگ آک بدلینگنگ ءُ۔ وخت ئنا چکر تینا رفتار ئٹی ہننگ ءِ۔ ولے کنا زند ہمو ساعت و وخت ئٹی سلوک ءِ ہرا دے آ نی جتا مسس۔ ہمودے آن ہلیس اینو اسکان ای ودار نا خاخر ئٹ پُتک ہلنگ اُٹ۔ اسہ ہندنو خاخر ئس ہرا کنا زند ئنا غٹ رنگ آتے ہشسا ہِس جوڑ کرینے و ای ہندا پُتک تروکا خاخر نا کہنگ نا ودار اٹ کہ ولدا ہراتم نیتون اوڑدئی مریک۔
دا وخت آ ای تینتون تینٹ ہیت کننگ اُٹ۔ ولے امر کیو نا مُری آن پد تنیائی کنے تینا خمب ئٹی ہلک۔ ای دا تنیائی آن پیشتمنگ کن ہر وڑ کوشست کیوہ ولے ہر وار بے سہب مریوہ۔ داسہ تو دا بیزاری تون کنا سنگتی مسنے۔ ہندا سوب آن بیرہ ای تینے بنیوہ و تینتون تینٹ ہیت کیوہ۔
وخت وخت ہندن مارشت مریک کہ ای تینتون تینٹ جنگ تننگ اُٹ۔ ہندنو جنگ ئس کہ ہرا نا ایسری بس نیتون تفوک ءِ، ہرا دے نی پدا کنا خنتا مونا مروس ہمو دے ای دا جنگ ئٹ سر سہب مروٹ۔
مننگ کیک کنتو ہمو لوز آک ساڑی افس ہراتیٹ ای تینا ڈکھ و غم تے درشان کننگ کیو۔ ولے ہرا دے نی پدا بروس ہمو دے ای نیتون تینا غٹ ہیت آتے کروٹ۔ دا یانزدہ سال نا ہمو غٹ ساعت آک ہراتے ای نے آن بیدس گدریفینٹ۔
نے سما ءِ۔۔۔؟ اینو پگہ کنا کتاب آتون سنگتی مسنے۔ کنے سما ءِ نی دادے بننگ آن پد بھاز خوش مروس انتئے کہ نے ہم کتاب آتون بھاز مہر ئس۔
نے یات ءِ۔۔۔۔؟ نی ”آرٹ آف وار“ کتاب نا تہٹی تینا دو تیٹ اسہ پُل ئس تخاسس؟ نے باور ہم بفرو، کہ ہمو پُل اینو اسکان ہمو کتاب ئٹ تخوک ءِ و ای کتاب و پُل ہڑتوماتا رکھ ءِ کرینٹ۔ ہراتم نی پدا بروس تو ای نے الم نشان تروٹ تا۔ ای نا کتاب آتا خیالداری ءِ کرینٹ۔ کنے یخین ءِ نی الم پدا بروس و نن ولدا ہتم نا مد ئنا رنگ آتون آسمان آ سفر کرون۔