سندھی قوم پرست راہشون و وائس فار مسنگ پرسنز آف سندھ ئنا سروک سورٹھ لوہار و سسئی لوہار نا باوہ ہدایت لوہار ءِ ریاست نا دو آن شہید کننگ نا برخلاف برانز چرجوئی ئٹ پنچ دے برجاء سلینگ آن گڈ استو ننکان پریس کانفرنس آن گڈ ایسر مس۔
پریس کانفرنس کرسا سورٹھ لوہار و سسئی لوہار نا پاننگ اس کہ نن تینا باوہ نا خون ئنا ایف آئی آر کن کورٹ ئٹی پٹیشن تسونن و قانودی کاریم تے مُستی درینن، ولے ننے پاکستانی عدالت آتیان انصاف نا ہچو امیت اف، ننا انصاف نا عدالت ننا سندھی قوم ءِ۔
او پاریر کہ نن تینا فریاد ءِ سندھی قوم ئنا مونا دننگ درون، دا رد ئٹ ننا جہد ئنا ارٹمیکو لڑ ئٹی اینو نن تیبہ سندھ ئٹی برانزی ریلی کشنگ نا خواست کینہ۔
اوفتا پاننگ اس کہ جہد ئنا مسٹمیکو لڑ ئٹی نن سندھ ئٹی اسہ بھلو برانز ئسے نا پڑو کرون۔
او پاریر کہ ننا جہد بیرہ ننا باوہ ءِ ریاست نا دو آن شہید کننگ نا برخلاف اف بلکہ سندھ ئنا ہمو غٹ مظلوم آ بندغ آتے نا حق کھسفنگ، زوراکی نا بیگواہی و ظلم و بربریت نا برخلاف ہموتم اسکان برجاء سلو ایسکان کہ دا فاشسٹ پاکستانی ریاست ننا ڈغار آ تینا فوجی کوزہ ءِ برجاء تخسہ تینا توفنک نا زور آ ننا بندغ آتیا ظلم و زوراکی کننگ ءِ۔
او پاریر کہ پاکستانی لشکر ننا باوہ شہید ہدایت لوہار ءِ سندھ ئنا آجوئی نا جہد ئنا ڈوہ ئٹی شہید کرینے۔ شہید ہدایت لوہار تون اوار سندھ ئنا غٹ شہید آتا بیر ءِ نن تینا ڈیہہ ئنا آجوئی نا دروشم ئٹ ہلون، ننا جہد برجاء مرو۔