بلوچستان نا علاقہ بولان ئٹ اینو ارٹمیکو دے ہم پاکستانی لشکر نا بھلو کچ اسیٹی فوجی آپریشن برجاء ءِ،گن شپ و ایلو ہیلی کاپٹر آتا ہن و بر برجاء ءِ وختس کہ جتاء ہند آتیا لشکر کمیپ ٹہیفیے۔
ٹی بی پی نیوز ڈیسک ءِ رسینگوکا حوالتا رد ئٹ اینو ارٹمیکو دے بولان، سبی و ہرنائی نا جتاء علاقہ بزگر، لکڑ، سانگان، لاکی، جمبرو، چکی وڈھ، میاں کور و ایب کیب ئنا علاقہ غا تیٹی آپریشن برجاء ءِ۔
حوال آتا رد ئٹ ہرناہی نا علاقہ جمبرو و چکی وڈھ ئٹ فوج خیمہ خلوم مسنے وختس کہ ہن و بر نا وخت چرجوئی ئٹ مارٹر گولہ فائر کننگ ءُ۔
سبی آن اسہ ہندی ئس ٹی بی پی تون ہیت کرسہ پارے کہ اینو سہب ئنا سبی آن بولان نا پارہ غا ود و کم ہشت گن شپ و پین ہیلی کاپٹر آتے ہننگ آ خنان۔
وختس کہ بزگر و سانگان، لاکی نا پارہ غا ترند وڑ ئنا تراک و سم کاری نا توار بننگانے۔ واہم علاقہ پلویڑ ئٹ مننگ نا سوب آن ودیک حوال ہلنگ منکن متو۔
علاقہ غاتیان سرپد حوالی پارے کہ لاکی، میاں کور گیشتر آباتی تیا تالانو علاقہ ءُ ہراڑے بندغ آک مالداری کرسہ تینا گزران ءِ کیرہ، اوفک گمان نا درشان کریر کہ آباتی تیا تالان علاقہ غاک آپریشن نا دک ئٹ مننگ نا سوب لس بندغ آتا جانی نسخان آتا گمان ءِ۔
اندا وڑ آپریشن نا وخت آ مالو آن زوراکی ئٹ بیگواہ غا بندغ آتے کسفنگ نا گمان نا درشان کنگانے۔
اِرا دے آن برجاء فوجی آپریشن نا باروٹ پاکستانی کالخواک دائسکان م ہچو حوال ئس فراوان کتنو۔
خیال مرے کہ تدوکا اِرا دے آن بولان و ایب کیب ئٹ بھلو کچ اسیٹی پاکستانی لشکر نا ہن و بر خننگ ئٹ بسُس ہراڑان گڈ درو فوجی آپریشن نا بناء مس۔
دا آپریشن نا بناء ہندنو وخت ئسے آ مس ہراتم 29 جنوری نا نن بلوچ لبریشن آرمی اسہ ترند ءُ جلہو اسیٹی پاکستانی لشکر نا ہیڈ کواٹر و فوجی چیک پوسٹ و سرکاری ماڑی تیا اسہ وخت آ جلہو کرسہ مچھ شار آ قوضہ کرے، ہرا قوضہ اِرا دے اسکان برجاء مس۔
پن کروک جلہو ئٹ بلوچ لبریشن آرمی نا جند ندر بمبار آتیا تالان مجید برگیڈ تون اوار بی ایل اے اسپیشل ٹیکٹیکل آپریشنز اسکواڈ و بی ایل اے نا فتح اسکواڈ بخش ہلک۔
گَل ئنا ترجمان جیئند بلوچ تینا اسہ بیان اسیٹی پارے کہ جلہو ئٹ 78 دژمن کارندہ مرگ ئنا گواچی کنگا وختس کہ او جلہو ئٹ بی ایل اے مجید برگیڈ نا 12 جند ندر و اسہ فتح اسکواڈ نا باسک ئس بیران مس۔