بلوچستان نا علاقہ بولان ئٹ اینو مسٹمیکو دے ہم پاکستانی لشکر نا پارہ غان لشکر کشی برجاء ءِ، اِرا کھریا بیگواہ۔
اینو مسٹمیکو دے سبی شار و بولان تون گنڈوک مَشی آ علاقہ تیٹ ہیلی کاپٹر آتا ہن و بر برجاء ءِ۔ ہندی حوالکار تا ردئٹ مَشی آ لڑ تیٹ ہیلی کاپٹر آتا شیلنگ و تراک آتا توار چرجوئی ئٹ بِننگ مریک۔
حوال تا ردئٹ آپریشن نا وخت آ گلہ بانی نا ہندی علیان پنی ءُ بندغ ئسے نا مارک درو آن بیگواہ ءُ۔
ہندی بندغ تا پاننگ ءِ کہ پن کروک ہڑتوم آ بندغ آک سوئی شابان نا علاقہ ئٹ تینا میڷ و ہیٹ تے خوافنگ ئسر ہراڑان پد او پدا بتنو، خُلیس ءِ کہ فورسز کارندہ غاک اوفتے دزگیر کرینو۔
خیال ئٹ مرے پاکستانی لشکر بولان و اوڑتون گنڈوک علاقہ تیٹ بھلو کچ ئسے آ لشکر کشی کننگ ءِ ہرانا دک ئٹ بزگر، لکڑ، سانگان، لاکی، جمبرو، چکی وڈھ، میاں کور و ایب کیب ئنا علاقہ غاک ءُ۔
پاکستانی کوالخواہ تا پارہ غان دائسکان لشکر کشی نا بابت ہچو ہیت اس مونا ہتنگتنے اندن لشکر کشی ٹی لس آباتی تے نسخان تننگ نا خُلیس پاش مننگسہ ءِ۔